പുല്‍പ്പള്ളി: മുള്ളന്‍കൊല്ലിയില്‍ നടക്കുന്ന സംസ്ഥാന സീനിയര്‍ ബാസ്‌ക്കറ്റ്‌ബോള്‍ ചാംപ്യന്‍ഷിപ്പില്‍ പ്രാഥമിക റൗണ്ട് മത്സരങ്ങള്‍ പൂര്‍ത്തിയായപ്പോള്‍ പുരുഷ വിഭാഗത്തില്‍ പാലക്കാടും, കൊല്ലവും ക്വാര്‍ട്ടര്‍ ഫൈനലിലെത്തി. പാലക്കാട് കളിച്ച രണ്ട് കളികളും വിജയിച്ച് ക്വാര്‍ട്ടറിലെത്തിയപ്പോള്‍ ഇടുക്കി, കാസര്‍കോട് ജില്ലകളെ പോയിന്റ് നിലയില്‍ പിന്നിലാക്കിയാണ് കൊല്ലം അവസാന എട്ടിലേക്ക് മുന്നേറിയത്.
നാല് ഗ്രൂപ്പുകളിലായാണ് മത്സരം നടക്കുന്നത്. വനിതാ വിഭാഗത്തില്‍ പാലക്കാട് കോഴിക്കോടിനെയും (സ്‌കോര്‍ 65- 54), തൃശൂര്‍ കണ്ണൂരിനെയും (സ്‌കോര്‍ 44- 30) തോല്‍പ്പിച്ചു.
പുരുഷ വിഭാഗത്തില്‍ നടന്ന വാശിയേറിയ മത്സരത്തില്‍ കോട്ടയം കണ്ണൂരിനെ 51- 47 എന്ന സ്‌കോറില്‍ പരാജയപ്പെടുത്തി. കഴിഞ്ഞ വര്‍ഷം മഞ്ചേരിയില്‍ നടന്ന സംസ്ഥാന ചാംപ്യന്‍ഷിപ്പില്‍ പുരുഷ വിഭാഗത്തില്‍ പത്തനംതിട്ടയും വനിതാ വിഭാഗത്തില്‍ തിരുവനന്തപുരവുമായിരുന്നു ജേതാക്കള്‍.