തൊടുപുഴ: എസ്.കെ.എസ്.എസ്.എഫ് ഇടുക്കി ജില്ലാ കമ്മിറ്റിയുടെ ആഭിമുഖ്യത്തില്‍ ഇന്ന് വൈകിട്ട് നാലിന് വണ്ണപ്പുറത്ത് ഫ്രീഡം സ്‌ക്വയര്‍ സംഘടിപ്പിക്കും. മഹാരാജാസ് കോളജ് ചരിത്ര വിഭാഗം അധ്യാപകന്‍ പ്രൊഫ സി എച്ച് അബ്ദുല്‍ ലത്തീഫ് ഉദ്ഘാടനം ചെയ്യും. എസ്.കെ.എസ്.എസ്.എഫ് ജില്ലാ പ്രസിഡന്റ് ഇസ്മായില്‍ മൗലവി പാലമല അധ്യക്ഷത വഹിക്കും. സ്വാതന്ത്ര്യദിന സന്ദേശ പ്രഭാഷണം മുനീര്‍ ഹുദവി തണ്ടേക്കാട് നിര്‍വഹിക്കും.
വണ്ണപ്പുറം ഗ്രാമപഞ്ചായത്ത് വൈസ് പ്രസിഡന്റ് കെ.എച്ച് അബ്ദുല്‍ അസീസ്, ഗ്രാമപഞ്ചായത്ത് അംഗങ്ങളായ റഷീദ് തോട്ടുങ്കല്‍, ബിനീഷ് ലാല്‍, കെ ഇ മുഹമ്മദ് മുസ് ലിയാര്‍, അബ്ദുല്‍ കബീര്‍ റഷാദി, ഹനീഫ് കാശിഫി, കെ.എച്ച് അബ്ദുല്‍ കരീം മൗലവി,  ജമാഅത്ത് പ്രസിഡന്റ് എ.എം പരീത് ഹാജി, ഷമീര്‍ ചക്കാലയ്ക്കല്‍, എം.എം ഫത്തഹുദ്ദീന്‍, പി.എം ഹനീഫ എന്നിവര്‍ ആശംസകള്‍ അര്‍പ്പിക്കും. സമസ്തയുടേയും പോഷക സംഘടനകളുടേയും ജില്ലാ നേതാക്കള്‍ പങ്കെടുക്കും.
രാജ്യത്തിന്റെ ജനാധിപത്യ സംവിധാനം ശക്തിപ്പെടുത്താനും സാമുദായിക സൗഹാര്‍ദ്ദത്തിന് വിള്ളലുണ്ടാക്കുന്ന വര്‍ഗ്ഗീയ ശക്തികളെ ചെറുത്തുനില്‍ക്കാനും പുതുതലമുറക്ക് ഇന്ത്യന്‍ സ്വാതന്ത്ര്യ സമരത്തിന്റെ യഥാര്‍ത്ഥ ചരിത്രം കൈമാറാനും രാജ്യത്തിന്റെ ഉയര്‍ച്ചക്ക്  കൈകോര്‍ത്ത് മുന്നേറാനും ഐ.എസ് പോലുള്ള തീവ്രവാദികള്‍ ഇസ്‌ലാമിനെ വികൃതമാക്കുമ്പോള്‍ ഇസ്‌ലാമിന്റെ സുന്ദരമായ സന്ദേശം വ്യക്തമാക്കാനുമാണ് ഫ്രീഡം സ്‌ക്വയര്‍ കൊണ്ട് ലക്ഷ്യമാക്കുന്നത്. ഫ്രീഡം സ്‌ക്വയര്‍ വിജയിപ്പിക്കാന്‍ മുഴുവന്‍ ബഹുജനങ്ങളോടും സമസ്ത ജില്ലാ കോ ഓഡിനേഷന്‍ കമ്മറ്റി അഭ്യര്‍ത്ഥിച്ചു.