ചെന്നൈ: ഐ.എസ്.എല്‍ പോരാട്ടത്തില്‍ സ്വന്തം തട്ടകത്തില്‍ നോര്‍ത്ത്ഈസ്റ്റ് യുനൈറ്റഡിനെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തി ചെന്നൈയിന്‍ എഫ്.സി സീസണിലെ ആദ്യ വിജയം സ്വന്തമാക്കി. ആദ്യ പോരാട്ടത്തില്‍ സമനില വഴങ്ങിയ വടക്കുകിഴക്കന്‍ ടീമും ആദ്യ മത്സരത്തില്‍ പരാജയമേറ്റു വാങ്ങിയ ചെന്നൈയിനും സീസണിലെ കന്നി വിജയം തേടിയാണ് കളത്തിലെത്തിയത്.
പന്തടക്കത്തിലും മത്സരം മെനയുന്നതിലും ആക്രമണത്തിലും ഇരു ടീമുകളും ഒപ്പം നിന്നപ്പോള്‍ കന്നത്ത പോരാട്ടം തന്നെ അരങ്ങേറി. എന്നാല്‍ അവസരം മുതലാക്കുന്നതില്‍ സ്വന്തം തട്ടകത്തില്‍ ചന്നൈയിന്‍ മികവ് പുലര്‍ത്തിയതാണ് കളിയിലെ കാതലായ മാറ്റം. പതിനൊന്നാം മിനുട്ടില്‍ ഹക്കു നെദിയോടത്ത് സെല്‍ഫ് ഗോളിലൂടെ ചെന്നൈയിന് ലീഡ് സമ്മാനിച്ചു. 24ാം മിനുട്ടില്‍ റാഫേല്‍ അഗുസ്റ്റോയുടെ ഗോളില്‍ ചെന്നൈയിന്‍ ലീഡുയര്‍ത്തി. 84ാം മിനുട്ടില്‍ മലയാളി താരം മുഹമ്മദ് റാഫി ടീമിന്റെ മൂന്നാം ഗോളും നേടി നോര്‍ത്ത്ഈസ്റ്റിന്റെ പതനം ഉറപ്പാക്കി. ജയത്തോടെ ചെന്നൈയിന്‍ മൂന്ന് പോയിന്റ് സ്വന്തമാക്കി.