ജയ്പൂര്‍: സഞ്ജയ് ലീല ബന്‍സാലിയുടെ വിവാദം കത്തിപ്പടരുന്ന 'പത്മാവതി' സിനിമയുമായി ബന്ധപ്പെട്ട് മരണവാര്‍ത്തയും. രാജസ്ഥാനിലെ നഹര്‍ഗര്‍ ഫോര്‍ട്ടില്‍ ആണ് മൃതദേഹം കണ്ടെത്തിയത്. മൃതദേഹത്തിനു സമീപം രണ്ടു പാറകളില്‍ സിനിമയ്ക്ക് എതിരായ മുദ്രാവാക്യങ്ങളും കണ്ടെത്തിയത്.

'ഞങ്ങള്‍ പ്രതിമകള്‍ കത്തിക്കാറില്ല, ഞങ്ങള്‍ കൊല്ലാറാണുള്ളത്' , പത്മാവതിയെ എതിര്‍ക്കുന്നു', എന്നിങ്ങനെ കൊത്തിവച്ച രണ്ടു കല്ലുകളാണ് മൃതദേഹത്തിനു സമീപം കണ്ടെത്തിയത്. ജയ്പൂരില്‍ നിന്ന് 20 കിലോമീറ്റര്‍ അകലെയാണ് സംഭവം. ബ്രഹ്മഗിരി പൊലിസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. ഇതൊരു കൊലപാതകമാണോ ആത്മഹത്യയാണോ എന്നത് സ്ഥിരീകരിച്ചിട്ടില്ലെന്ന് പൊലിസ് പറഞ്ഞു. മരിച്ചതാരാണെന്ന് തിരിച്ചറിഞ്ഞിട്ടില്ല.

നേരത്തെ രജ്പുത് കര്‍ണിസേന പത്മാവതി സിനിമക്കെതിരേ ആക്രോഷവുമായി രംഗത്തെത്തിയിരുന്നു. എന്നാല്‍, ഇത്തരം പ്രതിഷേധങ്ങള്‍ തങ്ങളുടെ രീതിയല്ലെന്ന് കര്‍ണിസേന അറിയിച്ചു.