തിരുവനന്തപുരം: പ്രതിപക്ഷ നേതാവ് രമേശ് ചെന്നിത്തല നയിക്കുന്ന പടയൊരുക്കത്തിന്റെ സമാപന സമ്മേളനം ഡിസംബര്‍ ഒന്നിന് തിരുവനന്തപുരം ശംഖുമുഖം കടപ്പുറത്തു നടക്കും.
വൈകിട്ട് അഞ്ചിന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ഉദ്ഘാടനം ചെയ്യുന്ന സമ്മേളനത്തിലേക്ക് മുന്നണി നേതാക്കള്‍ക്കുള്ള പ്രവേശനം പ്രത്യേക പാസ് വഴി നിയന്ത്രിക്കുമെന്ന് കെ.പി.സി.സി പ്രസിഡന്റ് അറിയിച്ചു. സുരക്ഷാ ക്രമീകരണങ്ങളുടെ ഭാഗമായാണ് പാസ് നല്‍കുന്നത്. കേന്ദ്ര സുരക്ഷാ ഉദ്യോഗസ്ഥരുടെ നിര്‍ദേശപ്രകാരമാണിത്. സമ്മേളനത്തില്‍ എ.കെ ആന്റണി അടക്കമുള്ള പ്രമുഖ നേതാക്കളും ഒരു ലക്ഷം യു.ഡി.എഫ് പ്രവര്‍ത്തകരും പങ്കെടുക്കും. രാഹുല്‍ ഗാന്ധി പിറ്റേന്ന് രാവിലെ ഒന്‍പതിന് ഇന്ദിരാഭവനില്‍ ചേരുന്ന കോണ്‍ഗ്രസ് നേതൃസംഗമവും ഉദ്ഘാടനം ചെയ്യും.