കിളിമാനൂര്‍: ഗ്യാസ് സിലിണ്ടറുകളുമായി വന്ന ലോറിക്ക്  ഓട്ടത്തിനിടയില്‍ തീപ്പിടിച്ചത് പരിഭ്രാന്തി പരത്തി.
കഴിഞ്ഞദിവസം രാവിലെ ആറുമണികഴിഞ്ഞായിരുന്നു സംഭവം.പാചകവാത സിലിണ്ടറുകളുമായി വന്ന ലോറി കിളിമാനൂര്‍ ടൗണ്‍ പിന്നിട്ട് ഇരട്ടച്ചിറ  ജങ്ഷനിലെത്തിയപ്പോഴാണ് കത്തിയത്. ലോറിയുടെ പുറകെ വന്ന ഒരുസ്‌കൂട്ടര്‍ യാത്രക്കാരിയാണ്  സംഭവം കണ്ടത്. ഇവര്‍ ബഹളം വെച്ചതിനെതുടര്‍ന്ന് ഡ്രൈവര്‍ ലോറി റോഡരികില്‍ നിര്‍ത്തി. ഈ സമയം  ഉഗ്രശബ്ദത്തോടെ തീയും പുകയും ഉയര്‍ന്നു. നാട്ടുകാര്‍ ഉടന്‍ സമീപത്തെ നീരുറവയില്‍നിന്ന് വെള്ളമെടുത്ത് തീയണച്ചു.
എറണാകുളത്ത് ഫില്ലിങ് സ്റ്റേഷനില്‍ നിന്ന് പാകതവാതകം നിറച്ചസിലിണ്ടറുകളുമായി വിഴിഞ്ഞത്തേക്ക് പോകുകയായിരുന്ന ലോറിയാണിത്. ചൂട് അമിതമായതിനെതുടര്‍ന്ന് എഞ്ചിന്‍പൊട്ടി ഓയില്‍ പുറത്ത് വന്ന് കത്തുകയായിരുന്നുവെന്നാണ് നിഗമനം.നാട്ടുകാരുടെ സന്ദര്‍ഭോചിതമായ ഇടപെടലിനെതുടര്‍ന്ന്  വന്‍ദുരന്തമാണ് ഒഴിവായത്.