ന്യൂഡല്‍ഹി: പാര്‍ട്ടിക്കും കേന്ദ്ര സര്‍ക്കാരിനുമെതിരേ വീണ്ടും പരിഹാസവുമായി ബി.ജെ.പി എം.പി ശത്രുഘ്‌നന്‍ സിന്‍ഹ. പ്രധാനമന്ത്രി മോദി, ധനമന്ത്രി അരുണ്‍ ജെയ്റ്റ്‌ലി, വാര്‍ത്താ വിതരണ പ്രക്ഷേപണ മന്ത്രി സ്മൃതി ഇറാനി എന്നിവരെ പരിഹസിച്ചുകൊണ്ടാണ് അദ്ദേഹം ഡല്‍ഹിയില്‍ നടന്ന ഒരു പുസ്തക പ്രകാശന ചടങ്ങില്‍ രൂക്ഷമായ പരിഹാസം നടത്തിയത്.
അഴിമതിയ്‌ക്കെതിരായി മോദി ആവര്‍ത്തിക്കുന്ന കൈക്കൂലി വാങ്ങരുത്, ഇതിനായി മറ്റുള്ളവരെ പ്രോത്സാഹിപ്പിക്കരുത് എന്ന കാര്യം ചൂണ്ടിക്കാട്ടിയാണ് അദ്ദേഹം പരിഹാസം തുടങ്ങിയത്. രാംമനോഹര്‍ ലോഹ്യ അവതരിപ്പിച്ച ആരോഗ്യകരമായ രാഷ്ട്രീയത്തോടാണ് തനിക്ക് താല്‍പര്യം. ജീവിക്കുകയുമില്ല, ജീവിക്കാന്‍ അനുവദിക്കുകയുമില്ല എന്ന മുദ്രാവാക്യവുമായല്ല താന്‍ രാഷ്ട്രീയത്തിലെത്തിയതെന്നും അദ്ദേഹം പറഞ്ഞു.
ഇപ്പോള്‍ രാജ്യത്ത് ഉയര്‍ന്നുവന്ന സാഹചര്യം ഒന്നുകില്‍ വ്യക്തിയെ പിന്തുണയ്ക്കുക, അല്ലെങ്കില്‍ ദേശ ദ്രോഹിയാകുക എന്നതാണ്. പ്രധാനമന്ത്രിയുടെ പേരെടുത്തു പറയാതെയാണ് അദ്ദേഹം വ്യക്തിയെ പിന്തുണയ്ക്കുകയെന്ന പരമാര്‍ശം നടത്തിയത്. ഒരു അഭിഭാഷകന്‍ ധനകാര്യമന്ത്രിയായി, ടെലിവിഷന്‍ താരം നേരത്തെ മാനവശേഷി വകുപ്പുമന്ത്രിയായി, ഒരു ചായക്കടക്കാരന്‍.... ഇല്ല താന്‍ വിവാദപരമായ പരാമര്‍ശങ്ങളൊന്നും നടത്തുന്നില്ലെന്ന് ശത്രുഘ്‌നന്‍ സിന്‍ഹ പറഞ്ഞു.
രാജ്യത്ത് എന്താണ് സംഭവിച്ചുകൊണ്ടിരിക്കുന്നത്. ഗോരക്ഷകരെന്ന പേരില്‍ ചിലര്‍ മനുഷ്യരെ കൊല്ലുന്നു. രാജ്യത്ത് ബുദ്ധി ജീവികളും ന്യായാധിപരും കൊല്ലപ്പെടുകയാണ്. ജനാധിപത്യത്തിനും മുകളില്‍ പണത്തിന്റെ സ്വാധീനം കാരണം ഇത്തരം പ്രശ്‌നങ്ങളൊന്നും കാര്യമായ രീതിയില്‍ മാധ്യമങ്ങളിവരുന്നില്ലെന്നും സിന്‍ഹ ആരോപിച്ചു.