ബാഴ്‌സലോണ: അര്‍ജന്റീന സൂപ്പര്‍ താരം ലയണല്‍ മെസ്സി കരിയറിലെ നാലാം ഗോള്‍ഡന്‍ ഷൂ പുരസ്‌കാരം ഏറ്റുവാങ്ങി. കഴിഞ്ഞ സീസണില്‍ യൂറോപ്പ്യന്‍ ലീഗ് പോരാട്ടങ്ങളില്‍ ഏറ്റവും കൂടുതല്‍ ഗോള്‍ നേടിയതിനാണ് മെസ്സി സുവര്‍ണ പാദുകം സ്വന്തമാക്കിയത്. സ്പാനിഷ് ലാ ലിഗയില്‍ ബാഴ്‌സലോണയ്ക്കായി കളിക്കുന്ന മെസ്സി കഴിഞ്ഞ സീസണില്‍ 37 ഗോളുകളാണ് നേടിയത്. പോര്‍ച്ചുഗീസ് ലീഗില്‍ കളിക്കുന്ന സ്‌പോര്‍ടിങ് ലിസ്ബന്റെ ഡച്ച് സ്‌ട്രൈക്കര്‍ ബാസ് ഡോസ്റ്റിനെയാണ് മെസ്സി പിന്തള്ളിയത്. താരം കഴിഞ്ഞ സീസണില്‍ 34 ഗോളുകള്‍ നേടിയിരുന്നു. നേരത്തെ 2009-10, 2011-12, 2012-13 വര്‍ഷങ്ങളിലും മെസ്സി സുവര്‍ണ പാദുകം സ്വന്തമാക്കിയിരുന്നു.