കൊച്ചി: നാലാം അധ്യായത്തിന്റെ അരങ്ങേറ്റത്തില്‍ നിന്ന് വ്യത്യസ്തമായി ഗാലറി ആവേശം ഉള്‍കൊണ്ടു കളിക്കാന്‍ കേരളത്തിന്റെ കൊമ്പന്മാര്‍ക്ക് കഴിഞ്ഞെങ്കിലും ഗോള്‍രഹിത സമനിലയില്‍ വീണ്ടും പര്യവസാനം കുറിച്ചത് ബ്ലാസ്റ്റേഴ്‌സ് പ്രേമികള്‍ക്ക് നിരാശയായി മാറി. കൊല്‍ക്കത്തയ്‌ക്കെതിരേയുള്ള ഉദ്ഘാടന പോരാട്ടത്തില്‍ നിന്ന് വ്യത്യസ്തമായി കളിയുടെ തുടക്കം മുതല്‍ തന്നെ മേധാവിത്വം പുലര്‍ത്തിയ ബ്ലാസ്റ്റേഴ്‌സിന് എതിരാളികളുടെ ഗോള്‍ വല അനക്കാന്‍ കഴിയാതെയാണ് വീണ്ടും ഹോം ഗ്രൗണ്ട് വിടേണ്ടിവന്നത്.
ബ്ലാസ്റ്റേഴ്‌സിന്റെ തട്ടകത്തിലെ രണ്ടാം പോരിന് 36752 പേരാണ് മഞ്ഞക്കടല്‍ തീര്‍ക്കാന്‍ എത്തിയത്. ഐ.എസ്.എല്ലിന്റെ സ്റ്റാര്‍ പ്ലസ് റേറ്റിങില്‍ ഒന്നാമതെത്തിയ കൊച്ചി ഫുട്‌ബോളിനെയും ബ്ലാസ്റ്റേഴ്‌സിനെയും എത്രമാത്രം സ്‌നേഹിക്കുന്നുവെന്ന് ഇന്നലെ തിങ്ങിനിറഞ്ഞ വേദി സാക്ഷ്യപ്പെടുത്തി. കളിയുടെ തുടക്കം മുതലെ കളം നിറഞ്ഞു കളിച്ച കേരള ബ്ലാസ്റ്റേഴ്‌സ് കളിയില്‍ പന്ത് കൈവശം വയ്ക്കുന്നതില്‍ 67 ശതമാനം ആധിപത്യം നിലനിര്‍ത്തി.
ജംഷഡ്പൂര്‍ താരങ്ങള്‍ 256 പാസുകള്‍ നടത്തിയപ്പോള്‍ കൃത്യതയാര്‍ന്ന 555 പാസുകളാണ് ബ്ലാസ്റ്റേഴ്‌സ് കൈമാറിയത്. എന്നാല്‍ കൃത്യതയാര്‍ന്ന ഷോട്ടുകളുടെ കാര്യത്തില്‍ ജംഷഡ്പൂര്‍ മേധാവിത്വം പുലര്‍ത്തി. അഞ്ചിനെതിരേ എട്ട് ഷോട്ടുകളാണ് ബ്ലാസ്റ്റേഴ്‌സിനെതിരേ തൊടുക്കാന്‍ കഴിഞ്ഞത്.