കാബൂള്‍: അഫ്ഗാനിസ്താനില്‍ മതവിദ്യാഭ്യാസ സ്ഥാപനത്തില്‍ നടന്ന റോക്കറ്റ് ആക്രമണത്തില്‍ 20 താലിബാന്‍ ഭീകരര്‍ കൊല്ലപ്പെട്ടു. അഫ്ഗാന്‍ സൈന്യം നടത്തിയ ആക്രമണത്തിലാണ് ഇത്രയും ഭീകരരെ വധിക്കാനായത്. കൊല്ലപ്പെട്ടവരില്‍ കുട്ടികളൊന്നുമില്ലെന്ന് സര്‍ക്കാര്‍ വൃത്തങ്ങള്‍ അറിയിച്ചു.
തലസ്ഥാനമായ കാബൂളില്‍നിന്ന് 35 കി.മീറ്റര്‍ അകലെയുള്ള മധ്യകിഴക്കു പ്രവിശ്യയായ വര്‍ദാക്കിലാണ് സംഭവം. ഇവിടെ മതവിദ്യാഭ്യാസ കേന്ദ്രത്തില്‍ താലിബാന്‍ ഭീകരര്‍ ഒളിച്ചിരിക്കുന്നതായ വിവരത്തിന്റെ അടിസ്ഥാനത്തിലാണ് സൈന്യം ആക്രമണം നടത്തിയത്. സംഭവത്തില്‍ നാട്ടുകാര്‍ക്കൊന്നും അപായം സംഭവിച്ചിട്ടില്ലെന്നും വിദ്യാര്‍ഥികളെല്ലാം വീട്ടില്‍ പോയ ശേഷമാണ് സൈന്യം ആക്രമണം നടത്തിയതെന്നും വര്‍ദാക് ഗവര്‍ണര്‍ അബ്ദുറഹ്മാന്‍ മംഗാള്‍ അറിയിച്ചു.കഴിഞ്ഞ ഏതാനും മാസമായി താലിബാന്റെ നേതൃത്വത്തില്‍ സൈന്യത്തിനു നേരെ നിരവധി ആക്രമണങ്ങള്‍ നടന്നിരുന്നു. ഇതില്‍ നൂറിനടുത്ത് സൈനികര്‍ കൊല്ലപ്പെടുകയും ചെയ്തു.