ന്യൂഡല്‍ഹി: പൗരന്‍മാര്‍ക്ക് ഭരണഘടന അനുവദിച്ച മൗലികാവകാശങ്ങളില്‍ വിട്ടുവീഴ്ചയില്ലെന്നു സുപ്രിംകോടതി ചീഫ് ജസ്റ്റിസ് ദീപക് മിശ്ര.
മൗലികാവകാശം ഭരണഘടന അനുവദിച്ചതാണെന്നും പൗരന്‍മാര്‍ക്കു നല്‍കുന്ന അവകാശങ്ങള്‍ പ്രധാനപ്പെട്ടതാണെന്നും അദ്ദേഹം പറഞ്ഞു. ദേശീയ നിയമദിനത്തില്‍ സംഘടിപ്പിച്ച പരിപാടിയില്‍ സംസാരിക്കുകയായിരുന്നു അദ്ദേഹം.
ഭരണഘടന നല്‍കിയ പരമാധികാരമനുസരിച്ചാണ് സുപ്രിംകോടതി പ്രവര്‍ത്തിക്കുന്നതെന്നും അദ്ദേഹം കൂട്ടിച്ചേര്‍ത്തു. ജഡ്ജിമാരെ നിയമിക്കുന്ന കമ്മിഷന്‍ രൂപീകരിക്കാനുള്ള സര്‍ക്കാര്‍ തീരുമാനത്തെ നിരസിച്ച സുപ്രിംകോടതിയുടെ നടപടിയെ ചടങ്ങില്‍ കേന്ദ്ര നിയമമന്ത്രി രവിശങ്കര്‍ പ്രസാദ് വിമര്‍ശിച്ചിരുന്നു.
തെരഞ്ഞെടുക്കപ്പെട്ടെ സര്‍ക്കാരിനും ജുഡീഷ്യറിക്കും വെവ്വേറെ അധികാരങ്ങളുണ്ടെന്നും ജഡ്ജിമാരെ നിയമിക്കുന്നതില്‍ പ്രധാനമന്ത്രിയെയും നിയമ മന്ത്രിയെയും വിശ്വാസത്തിലെടുക്കാത്തതു വലിയ ചോദ്യങ്ങള്‍ക്കിടയാക്കുമെന്നും മന്ത്രി പറഞ്ഞു. ഇതിനു മറുപടിയായായിരുന്നു സുപ്രിംകോടതി ചീഫ് ജസ്റ്റിസിന്റെ പരാമര്‍ശങ്ങള്‍.
ജുഡീഷ്യറി നിയമമന്ത്രാലയത്തെ ബഹുമാനിക്കുന്നെന്നും അവരില്‍നിന്നു നിര്‍ദേശങ്ങള്‍ സ്വീകരിക്കാറുണ്ടെന്നും പറഞ്ഞ ചീഫ് ജസ്റ്റിസ്, പരസ്പര ബഹുമാനമാണ് വേണ്ടതെന്നും അഭിപ്രായപ്പെട്ടു. പാര്‍ലമെന്റ്, ജുഡീഷ്യറി, എക്‌സിക്യൂട്ടീവ് എന്നിവരുടെ മേല്‍ക്കോയ്മക്കാര്യത്തില്‍ തര്‍ക്കം വേണ്ടെന്നും അവയെല്ലാം ഭരണഘടനയില്‍ അധിഷ്ടിതമാണെന്നും ചീഫ് ജസ്റ്റിസ് പറഞ്ഞു.
സുപ്രിംകോടതിക്കു ബാധ്യത ഭരണഘടനയോടാണെന്നും അതാണ് കോടതിയുടെ തീരുമാനങ്ങളുടെ ഹേതുവെന്നും നിയമമന്ത്രിക്കു മറുപടിയെന്ന നിലയില്‍ അദ്ദേഹം പറഞ്ഞു.
ജഡ്ജി നിയമനത്തിനു ദേശീയ ജുഡീഷ്യല്‍ നിയമന കമ്മിഷന്‍ രൂപീകരിക്കാന്‍ പാര്‍ലമെന്റ് പാസാക്കിയ നിയമവും അതിനുള്ള ഭരണഘടനാ ഭേദഗതിയും രണ്ടു വര്‍ഷം മുന്‍പു സുപ്രിംകോടതി തള്ളിയിരുന്നു.
ഈ തീരുമാനങ്ങള്‍ ഭരണഘടനാ വിരുദ്ധമാണെന്നായിരുന്നു സുപ്രിംകോടതിയുടെ നിലപാട്.