ന്യൂഡല്‍ഹി: തമിഴ്‌നാട് മുന്‍മുഖ്യമന്ത്രി ജയലളിതയുടെ മകളാണെന്ന് അവകാശപ്പെട്ട യുവതിയുടെ ഡി.എന്‍.എ പരിശോധിക്കാന്‍ നടപടിയുണ്ടാകണമെന്നാവശ്യപ്പെട്ട് നല്‍കിയ ഹരജി സുപ്രിം കോടതി തള്ളി.
ജയയുടെ മകളാണെന്ന് പറയുന്ന അമൃതയെന്ന 37കാരിയാണ് ഡി.എന്‍.എ പരിശോധന നടത്തി അവകാശം തെളിയിക്കണമെന്നാവശ്യപ്പെട്ട് സുപ്രിം കോടതിയില്‍ ഹരജി നല്‍കിയത്.
ജയയുടെ സഹോദരി ശൈലജയും അവരുടെ ഭര്‍ത്താവ് സാരഥിയുമാണ് തന്നെ ബംഗളൂരുവില്‍ കൊണ്ടുവന്നതെന്ന് അമൃത അവകാശപ്പെടുന്നു. സാരഥിയാണ് അദ്ദേഹത്തിന്റെ മരണത്തിന്റെ ഏതാനും ദിവസങ്ങള്‍ക്ക് മുന്‍പ് താന്‍ ജയയുടെ മകളാണെന്ന കാര്യം വെളിപ്പെടുത്തിയത്.
തന്റെ അവകാശവാദത്തെ എതിര്‍ത്തിരുന്നത് ജയയുടെ സന്തത സഹചാരിയായിരുന്ന ശശികലയാണെന്നും അമൃത ആരോപിക്കുന്നു. ഇതുസംബന്ധിച്ച് രാഷ്ട്രപതി രാംനാഥ് കോവിന്ദ്, പ്രധാനമന്ത്രി നരേന്ദ്ര മോദി, സുപ്രിം കോടതി ജഡ്ജിമാര്‍, സി.ബി.ഐ എന്നിവര്‍ക്ക് പരാതി നല്‍കിയിരുന്നെങ്കിലും ഒരുനടപടിയും ഉണ്ടായില്ലെന്നും ഹരജിയില്‍ ചൂണ്ടിക്കാട്ടിയിരുന്നു.
ജയയുടെ അഭിമാനം മുന്‍നിര്‍ത്തിയാണ് തന്റെ അവകാശവാദത്തെ മറ്റുള്ളവര്‍ അംഗീകരിക്കാതെ തന്നെ അകറ്റിയത്.
1980 ഓഗസ്റ്റ് 14നാണ് താന്‍ ജനിച്ചത്. ചെന്നൈയിലെ മൈലാപ്പൂരുള്ള ജയയുടെ വസതിയിലാണ് ജനനമെന്നും യുവതി പറയുന്നു. ജയ ആശുപത്രിയില്‍ കഴിയവെ നാല് തവണ സന്ദര്‍ശനത്തിനായി എത്തിയിരുന്നെങ്കിലും അപ്പോഴെല്ലാം ശശികല തന്നെ അകറ്റി നിര്‍ത്തുകയായിരുന്നുവെന്ന് യുവതി ഹരജിയില്‍ പറഞ്ഞിരുന്നു.