മിലാന്‍: ഇറ്റാലിയന്‍ സീരി എ ടീം എ.സി മിലാന്‍ കോച്ച് വിന്‌സെന്‍സോ മൊണ്ടെല്ലെയെ പുറത്താക്കി. സീസണില്‍ ടീമിന്റെ മോശം പ്രകടനത്തെ തുടര്‍ന്നാണ് കോച്ചിനെതിരേ ക്ലബ് നടപടിയെടുത്തത്. മുന്‍ ഇതിഹാസ താരം ഗന്നാരോ ഗട്ടുസോയെ പകരം പരിശീലകനായി ക്ലബ് നിയമിച്ചു. കഴിഞ്ഞ ദിവസം സ്വന്തം തട്ടകത്തില്‍ ടൊറിനോയുമായി ഗോള്‍രഹിത സമനിലയില്‍ മത്സരം അവസാനിച്ചതിന് പിന്നാലെയാണ് കോച്ചിന്റെ സ്ഥാനം തെറിച്ചത്. 14 മത്സരങ്ങള്‍ പൂര്‍ത്തിയായപ്പോള്‍ ടീം 20 പോയിന്റുകളുമായി ഏഴാം സ്ഥാനത്താണ്.
39കാരനായ ഗട്ടുസോ 1999 മുതല്‍ 2012 വരെ മിലാന്‍ കുപ്പായത്തില്‍ കളിച്ച താരമാണ്. 387 മത്സരങ്ങളിലാണ് താരം ടീമിനായി കളത്തിലിറങ്ങിയത്. സ്വിസ് സൂപ്പര്‍ ലീഗ് ടീം സിയോണിന്റെ കളിക്കാരനും കോച്ചുമായി പരിശീലക കരിയര്‍ ആരംഭിച്ച ഗട്ടുസോ സീരി ബി ടീം പാലെര്‍മോയുടെയും പരിശീലകനായിരുന്നു. കളിക്കുന്ന കാലത്ത് ഏറ്റവും കടുപ്പക്കാരനായ ഇറ്റാലിയന്‍ പ്രതിരോധ താരമെന്ന പേരിലാണ് ഗട്ടുസോ ശ്രദ്ധേയനായത്.