ലാഹ്‌ലി: രഞ്ജി ട്രോഫി ക്രിക്കറ്റില്‍ ചരിത്രനേട്ടവുമായി കേരളം. ഹരിയാനയെ ഒരു ഇന്നിംഗ്‌സിനും 
എട്ട് റണ്‍സിനും തകര്‍ത്ത് കേരളം ക്വാര്‍ട്ടര്‍ ഫൈനലില്‍ പ്രവേശിച്ചു. പത്ത് വര്‍ഷത്തിന് ശേഷമാണ് കേരളം രഞ്ജിയുടെ നോക്കൗട്ട് റൗണ്ടിലേക്ക് പ്രവേശിക്കുന്നത്.

ഹരിയാനയുടെ രണ്ടാം ഇന്നിംഗ്‌സ് 173 റണ്‍സില്‍ അവസാനിച്ചതോടെയാണ് കേരളം ചരിത്രം നേട്ടം സ്വന്തമാക്കിയത്. 31 പോയിന്റുമായി ഗ്രൂപ്പില്‍ ഗുജറാത്തിന് പിന്നില്‍ രണ്ടാം സ്ഥാനത്താണ് കേരളം. സീസണില്‍ ആറ് മത്സരങ്ങളില്‍ ഒന്നില്‍ മാത്രമാണ് കേരളം തോറ്റത്.

അവസാന ദിവസം അഞ്ച് വിക്കറ്റ് മാത്രം അകലെയായിരുന്നു കേരളത്തിന്റെ ചരിത്ര വിജയം. മൂന്ന് വിക്കറ്റ് വീതം നേടിയ നിധീഷ് എം.ഡി, ജലജ് സക്‌സേന എന്നിവര്‍ ബൗളിങില്‍ മികവു കാട്ടി.

ബേസില്‍ തമ്പി രണ്ടും സന്ദീപ് വാര്യര്‍, അരുണ്‍ കാര്‍ത്തിക് എന്നിവര്‍ ഓരോ വിക്കറ്റും നേടി. സ്‌കോര്‍: ഹരിയാന ഒന്നാം ഇന്നിങ്‌സ് 208, രണ്ടാം ഇന്നിങ്‌സ് 173. കേരളം ഒന്നാം ഇന്നിങ്‌സ് 389.