കൊണ്ടോട്ടി: ഹാദിയയെ സേലത്തെ ശിവരാജ് ഹോമിയോപ്പതി മെഡിക്കല്‍ കോളജില്‍ പോയി കാണുമെന്ന് ഭര്‍ത്താവ് ഷെഫിന്‍ ജഹാന്‍ പറഞ്ഞു.സുപ്രിം കോടതിയുടെ ഇടക്കാല ഉത്തരവിന് ശേഷം ദില്ലിയില്‍ നിന്ന് കരിപ്പൂരിലെത്തിയ ഷെഫിന്‍ വിമാനത്താവളത്തില്‍ മാധ്യമങ്ങളോട് സംസാരിക്കുകയായിരുന്നു. കോളജിലെ പ്രവേശന നടപടികള്‍ പൂര്‍ത്തിയായതിനു ശേഷമാണ് ഹാദിയയെ നേരില്‍ കാണുക. ഹാദിയയെ കാണുന്നതിന് ഒരു തടസവും കോടതി പറഞ്ഞിട്ടില്ല. അവള്‍ സ്വതന്ത്രയായതില്‍ സന്തോഷമുണ്ട്. തനിക്ക് ഐ.എസ് ബന്ധമുണ്ടെന്ന എന്‍.ഐ.എ ആരോപണം അടിസ്ഥാനരഹിതമാണ്. ഇത്തരം ആരോപണങ്ങളെല്ലാം ഹൈക്കോടതിയില്‍ തന്നെ ഖണ്ഡിക്കപ്പെട്ടതാണ്.
വ്യാജമായ ആരോപണങ്ങളാണ് തനിക്കെതിരേ ഉന്നയിക്കുന്നതെന്നും ഷെഫിന്‍ പറഞ്ഞു. ഇന്നലെ ഉച്ചക്ക് രണ്ട് മണിയോടെയാണ് അഭിഭാഷകന്‍ കെ.സി.നസീറിനൊപ്പം ഷെഫിന്‍ ജഹാന്‍ കരിപ്പൂരിലെത്തിയത്.