കോഴിക്കോട്: പ്രവാചകന്റെ വിശുദ്ധ ജീവിതമാണ് ഇസ്‌ലാമിന്റെ മൂല്യങ്ങളെ ലോകത്തിന് പരിചയപ്പെടുത്തിയതെന്നും ആധുനിക ലോകം നേരിടുന്ന വെല്ലുവിളികള്‍ക്ക് പരിഹാരം പ്രവാചകന്റെ ജീവിതമാണെന്നും സമസ്ത പ്രസിഡന്റും സുപ്രഭാതം ചെയര്‍മാനുമായ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍. സുപ്രഭാതം നബിദിനപ്പതിപ്പ് പ്രകാശനം ചെയ്തു സംസാരിക്കുകയായിരുന്നു അദ്ദേഹം. ആദ്യ പതിപ്പ് കെ. ഇബ്‌റാഹിം ഹാജി തിരൂര്‍ ഏറ്റുവാങ്ങി.
മറ്റു മതങ്ങളോടും ജീവജാലങ്ങളോടും ഭൂമിയിലെ വസ്തുക്കളോടും എങ്ങനെ പെരുമാറണമെന്ന് പഠിപ്പിച്ചത് പ്രവാചകനാണ്. മുസ്‌ലിംകള്‍ തമ്മില്‍ എങ്ങനെ പെരുമാറണമെന്ന് പഠിപ്പിച്ച നബി(സ) ഇതരസമുദായക്കാരുമായി സൗഹാര്‍ദം എങ്ങനെ ഊട്ടിയുറപ്പിക്കണമെന്നും പഠിപ്പിച്ചു. പ്രവാചകന്റെ ജീവിതം മറ്റുള്ളവരെ അറിയിക്കുകയെന്ന ദൗത്യമാണ് സുപ്രഭാതം നബിദിനപ്പതിപ്പിലൂടെ നിര്‍വഹിച്ചതെന്നും അദ്ദേഹം പറഞ്ഞു.
മാനേജിങ് എഡിറ്റര്‍ നവാസ് പൂനൂര്‍ അധ്യക്ഷനായി. എക്‌സിക്യൂട്ടീവ് എഡിറ്റര്‍ എ. സജീവന്‍, സമസ്ത മാനേജര്‍ കെ. മോയിന്‍കുട്ടി മാസ്റ്റര്‍, പി.കെ മുഹമ്മദ്, ബി.കെ.എസ് തങ്ങള്‍ എടവണ്ണപ്പാറ സംബന്ധിച്ചു. ഐ.എം അബ്ദുറഹ്മാന്‍ സ്വാഗതവും ഹംസ ആലുങ്ങല്‍ നന്ദിയും പറഞ്ഞു.