കൊച്ചി: ഗുജറാത്തില്‍ താമസിക്കുന്ന റാന്നി സ്വദേശിനിയെ മതം മാറ്റി വിവാഹം കഴിച്ച് ഐ.എസില്‍ ചേര്‍ക്കാന്‍ ശ്രമിച്ചെന്ന ഹരജിയില്‍ ഹൈക്കോടതി നിര്‍ദേശിച്ചാല്‍ അന്വേഷണം ഏറ്റെടുക്കാമെന്ന് എന്‍.ഐഎ. റാന്നി സ്വദേശിനിയായ അക്ഷര ബോസിനെ മതം മാറ്റിയെന്ന കേസിലാണ് നിലപാട്.
അക്ഷര ബോസ് തന്റെ ഭര്‍ത്താവായ ന്യൂ മാഹി പെരിങ്ങണ്ടി സ്വദേശി മുഹമ്മദ് റിയാസിനെതിരേ നല്‍കിയ ഹരജിയിലാണ് ദേശീയ അന്വേഷണ സംഘം നിലപാട് അറിയിച്ചത്.
എന്നാല്‍, അക്ഷര പരാതി നല്‍കിയിട്ടില്ലെന്നും ആ നിലയ്ക്ക് സംസ്ഥാന സര്‍ക്കാര്‍ നടപടിയെടുത്തില്ലെന്ന വാദം ശരിയല്ലെന്നും പൊലിസ് വ്യക്തമാക്കി. പൊലിസ് ഹെഡ് ക്വാര്‍ട്ടേഴ്‌സ് എ.ഐ.ജി ജി. ശ്രീധരന്‍ ഹൈക്കോടതിയില്‍ സ്റ്റേറ്റ്‌മെന്റ് നല്‍കി.
കണ്ണൂര്‍, പത്തനംതിട്ട, എറണാകുളം റൂറല്‍ ജില്ലാ പൊലിസ് മേധാവികളോട് ഹരജിയിലെ ആരോപണങ്ങളെക്കുറിച്ച് അന്വേഷിക്കാന്‍ നിര്‍ദേശിച്ചു. പെരിങ്ങണ്ടിയിലെ അഡ്രസില്‍ റിയാസ് ഇല്ലെന്ന് കണ്ടെത്തിയിട്ടുണ്ട്.
പെരിങ്ങണ്ടിയിലെ വീട് പൂട്ടി റിയാസ് പത്ത് വര്‍ഷമായി ബംഗളൂരുവിലും എറണാകുളത്തുമായാണ് താമസമെന്നും മറ്റ് കുടുംബാംഗങ്ങള്‍ എറണാകുളത്തെവിടെയോ ഉണ്ടെന്നും അയല്‍ക്കാര്‍ മൊഴി നല്‍കിയിട്ടുണ്ടെന്ന് പൊലിസ് വ്യക്തമാക്കി. മതം മാറി അയിഷ എന്ന പേര് സ്വീകരിച്ച് വ്യാജ ആധാര്‍ കാര്‍ഡ് ഉണ്ടാക്കി 2016 മെയ് 21ന് റിയാസ് വിവാഹം രജിസ്റ്റര്‍ ചെയ്തു.
പിന്നീട് ഹരജിക്കാരിയെ സഊദിയിലേക്കും സിറിയയിലേക്കും കൊണ്ടുപോകാനായി പാസ്‌പോര്‍ട്ട് എടുപ്പിച്ചു. റിയാസിനെ ഭയന്ന് 2016 ഒക്ടോബര്‍ 15ന് ബംഗളൂരുവില്‍നിന്ന് അഹമ്മദാബാദിലേക്ക് പോയെന്നും ഹരജിയില്‍ പറയുന്നു.
എന്നാല്‍, അക്ഷരയെ പിതാവ് തടങ്കലിലാക്കിയെന്നാരോപിച്ച് റിയാസ് നല്‍കിയ ഹരജിയില്‍ തനിക്ക് റിയാസിനൊപ്പം പോകാന്‍ ഇഷ്ടമാണെന്ന് അക്ഷര പറഞ്ഞിരുന്നു. തുടര്‍ന്ന് 2017 ജനുവരി 23ന് റിയാസിനൊപ്പം പോകാന്‍ അനുവദിച്ച് ഹൈക്കോടതി ഉത്തരവായി. ഇതിനുശേഷം താന്‍ റിയാസിന്റെയും മാതാപിതാക്കളുടെയും നിയന്ത്രണത്തിലായെന്നും മാതാപിതാക്കളെ ഫോണില്‍ വിളിക്കാന്‍ പോലും അനുവദിച്ചില്ലെന്നും അക്ഷര ആരോപിക്കുന്നു.
റിയാസും മാതാപിതാക്കളും ചേര്‍ന്ന് തന്നെ ജിദ്ദയിലേക്ക് കൊണ്ടുപോയി മാനസികമായും ശാരീരികമായും ഉപദ്രവിച്ചു. സിറിയയിലേക്ക് കടത്താന്‍ നീക്കമുണ്ടെന്ന് അറിഞ്ഞതോടെ രക്ഷപ്പെട്ട് ഒക്ടോബര്‍ അഞ്ചിന് അഹമ്മദാബാദിലെത്തിയെന്നും തന്നെ കുടുക്കിയ സംഭവത്തെക്കുറിച്ച് എന്‍.ഐ.എ അന്വേഷിക്കണമെന്നുമാണ് ഹരജിയിലെ ആവശ്യം.