മഡ്ഗാവ്: ഏഴ് ഗോള്‍ പിറന്ന പോരാട്ടത്തില്‍ ബംഗളൂരു എഫ്.സിയുടെ വിജയ കുതിപ്പിന് കടിഞ്ഞാണിട്ട് എഫ്.സി ഗോവ. ത്രില്ലര്‍ പോരില്‍ 4-3നാണ് ഗോവ സ്വന്തം തട്ടകത്തില്‍ സീസണിലെ രണ്ടാം വിജയം പിടിച്ചത്. ആദ്യ രണ്ട് മത്സരങ്ങളും വിജയിച്ച് മുന്നേറിയ ബംഗളൂരു സീസണിലെ ആദ്യ തോല്‍വിയാണ് വഴങ്ങിയത്. ഫെറാന്‍ കൊറോമിനസിന്റെ ഹാട്രിക്ക് ഗോളാണ് മത്സരത്തില്‍ ഗോവയ്ക്ക് ആധിപത്യം സമ്മാനിച്ചത്.
കളിയുടെ 36ാം മിനുട്ടില്‍ ഗോള്‍ കീപ്പര്‍ ഗുര്‍പ്രീത് സിങ് സന്ധുവിന് ചുവപ്പ് കാര്‍ഡ് കണ്ട് പുറത്ത് പോകേണ്ടി വന്നതോടെ പത്ത് പേരുമായി മത്സരിക്കേണ്ട ഗതികേടായിരുന്നു ബംഗളൂരുവിന്. എന്നിട്ടും അവര്‍ പൊരുതി നിന്നു.
കളിയുടെ 16ാം മിനുട്ടില്‍ കൊറോമിനസ് ഗോവയ്ക്ക് ലീഡ് സമ്മാനിച്ചെങ്കിലും 20ാം മിനുട്ടില്‍ ബംഗളൂരു ഗോള്‍ മടക്കി.33ാം മിനുട്ടില്‍ കൊറോമിനസ് വീണ്ടും വല ചലിപ്പിച്ച് ഗോവയെ മുന്നിലെത്തിച്ചു.
40ാം മിനുട്ടില്‍ ലഭിച്ച പെനാല്‍റ്റി വലയിലാക്കി മാനുവല്‍ ബ്രുണോ ഗോവയ്ക്ക് മൂന്നാം ഗോള്‍ സമ്മാനിച്ചു. ഇടവേളയ്ക്ക് പിരിയുമ്പോള്‍ 3-1ന് ബംഗളൂരു പിന്നില്‍. എന്നാല്‍ രണ്ടാം പകുതി തുടങ്ങി 57ാം മിനുട്ടില്‍ എറിക് പാര്‍തലു ബംഗളൂരുവിന് രണ്ടാം ഗോളും 60ാം മിനുട്ടില്‍ മികു സമനില ഗോളും സമ്മാനിച്ചതോടെ മത്സരം ഇഞ്ചോടിഞ്ചായി. 63ാം മിനുട്ടില്‍ കൊറോമിനസ് വീണ്ടും ഗോവയുടെ രക്ഷകനായി മാറി നാലാം ഗോള്‍ വലയിലാക്കി സ്വന്തം തട്ടകത്തില്‍ ടീമിന് വിജയമൊരുക്കുകയായിരുന്നു.