കണ്ണൂര്‍: ഗ്രേസ് മാര്‍ക്ക് കൂട്ടിച്ചേര്‍ക്കുന്നതിന് കണ്ണൂര്‍ സര്‍വകലാശാലയില്‍ സമര്‍പ്പിച്ച വിദ്യാര്‍ഥിയുടെ സര്‍ട്ടിഫിക്കറ്റ് കാണാനില്ല. ബാസ്‌ക്കറ്റ്‌ബോള്‍ താരം ചന്ദനക്കാംപാറ സ്വദേശി സജേഷ് കെ. ജയന്റെ ഡിഗ്രി സര്‍ട്ടിഫിക്കറ്റുകളാണ് കാണാതായത്. സര്‍ട്ടിഫിക്കറ്റ് നഷ്ടമായതോടെ ഉപരിപഠനം വഴിമുട്ടിയ സജേഷ് ബസ് ക്ലീനര്‍ ജോലി ചെയ്യുകയാണ്. 2013-16 വര്‍ഷം ശ്രീകണ്ഠാപുരം എസ്.ഇ.എസ് കോളജില്‍ ബി.എ ഇക്കണോമിക്‌സ് പൂര്‍ത്തിയാക്കിയിരുന്നു സജേഷ്.

കോഴ്‌സ് പൂര്‍ത്തിയാക്കിയ ഉടന്‍ അഞ്ച്, ആറ് സെമസ്റ്ററുകളില്‍ രണ്ട് ശതമാനം വീതം സ്‌പോര്‍ട്‌സ് വിഭാഗത്തിന്റെയും എന്‍.എസ്.എസിന്റെയും ഗ്രേസ് മാര്‍ക്ക് കൂട്ടിച്ചേര്‍ക്കുന്നതിന് അപേക്ഷയും സര്‍ട്ടിഫിക്കറ്റുകളും സര്‍വകലാശാലയില്‍ സമര്‍പ്പിച്ചു. മാസങ്ങള്‍ കഴിഞ്ഞിട്ടും സര്‍ട്ടിഫിക്കറ്റ് ലഭിക്കാതായതോടെ അന്വേഷിച്ചപ്പോഴാണ് സര്‍ട്ടിഫിക്കറ്റ് കാണാനില്ലെന്ന് അധികൃതര്‍ കൈമലര്‍ത്തിയത്.
സിന്‍ഡിക്കേറ്റ് ഭരണം മാറുന്നതിന് മുന്‍പ് സെക്ഷനില്‍ ഉണ്ടായിരുന്ന ഉദ്യോഗസ്ഥര്‍ ഗ്രേസ് മാര്‍ക്ക് കൂട്ടിച്ചേര്‍ത്തില്ലെന്നും സമര്‍പ്പിച്ച സര്‍ട്ടിഫിക്കറ്റ് കാണാനില്ലെന്നുമായിരുന്നു മറുപടി. ജീവനക്കാരുടെ പിടിപ്പുകേടു കാരണം ഉപരിപഠനവും തൊഴില്‍ സാധ്യതകളും നഷ്ടമാകുന്നതിന്റെ വേദനയിലാണ് ഈ യുവാവ്.