ന്യൂഡല്‍ഹി: നാവിക സേനക്ക് ശക്തിപകരാനായി ആണവായുധ ശേഷിയുള്ള ആറ് മുങ്ങിക്കപ്പലുകള്‍ ഇന്ത്യ നിര്‍മിക്കുന്നു. ഇന്ത്യാ-പെസഫിക് മേഖലയില്‍ ചൈനയുടെ സൈനിക ശക്തിയെ എതിരിടുകയെന്നതാണ് തദ്ദേശീയമായി മുങ്ങിക്കപ്പലുകള്‍ നിര്‍മിക്കാനുള്ള തീരുമാനത്തിന് പിന്നില്‍.
ഇതിന്റെ പ്രാരംഭ പ്രവര്‍ത്തനങ്ങള്‍ തുടങ്ങിയതായി നാവിക സേനാ മേധാവി അഡ്മിറല്‍ സുനില്‍ ലാംബ അറിയിച്ചു. ഇന്ത്യാ-പെസഫിക് മേഖലയില്‍ ഇന്ത്യന്‍ നാവിക സേനക്ക് തന്ത്രപരമായ ദൗത്യങ്ങള്‍ നിര്‍വഹിക്കാനുണ്ട്. അതേസമയം കൂടുതല്‍ വിവരങ്ങള്‍ വെളിപ്പെടുത്താനാകില്ലെന്ന് അദ്ദേഹം അറിയിച്ചു.
വെല്ലുവിളികള്‍ പരമ്പരാഗതമായതോ അല്ലാത്തതോ ആകട്ടെ, അവ നേരിടാന്‍ നാവിക സേന സജ്ജമാണ്. കടല്‍ക്കൊള്ളക്കാരെ നേരിടാനെന്ന പേരില്‍ ഇന്ത്യന്‍ മഹാസമുദ്രത്തില്‍ ചൈന അന്തര്‍ വാഹിനികള്‍ സ്ഥാപിക്കുന്നതുള്‍പ്പെടെയുള്ള സുരക്ഷാ ഭീഷണികള്‍ നിലനില്‍ക്കുന്നതിനാല്‍ പദ്ധതികള്‍ എത്രയും പെട്ടെന്ന് പൂര്‍ത്തിയാക്കാനാണ് ശ്രമമെന്നും നാവിക സേനാ മേധാവി അറിയിച്ചു.
ആണവോര്‍ജത്തില്‍ പ്രവര്‍ത്തിക്കുന്ന ഐ.എന്‍.എസ് അരിഹിന്ദ്, ഐ.എന്‍.എസ് ചക്ര എന്നിവയ്ക്കുപുറമെ 13 മുങ്ങിക്കപ്പലുകള്‍ നാവിക സേനക്കുണ്ട്. ഇതിന് പുറമെയാണ് ആറ് ആണവ അന്തര്‍വാഹിനികള്‍കൂടി നിര്‍മിക്കാന്‍ തീരുമാനിച്ചത്.