തെല്‍അവീവ്: ഇസ്‌റാഈല്‍ തലസ്ഥാനമായ തെല്‍അവീവില്‍ പതിനായിരങ്ങള്‍ പങ്കെടുത്ത അഴിമതി വിരുദ്ധ പ്രതിഷേധ റാലി നടന്നു. സര്‍ക്കാരിലെ അഴിമതിയിലും പ്രധാനമന്ത്രി ബിന്‍യാമീന്‍ നെതന്യാഹുവിനെതിരായ ആരോപണങ്ങളിലും അന്വേഷണം വൈകുന്നതില്‍ പ്രതിഷേധിച്ചാണ് പ്രകടനം.
സമ്പന്നരായ വ്യക്തികളില്‍നിന്ന് ആഡംബര പാരിതോഷികങ്ങള്‍ സ്വീകരിച്ചു, അനുകൂല വാര്‍ത്ത പ്രസിദ്ധീകരിക്കാനായി മുന്‍നിര ഇസ്‌റാഈലി പത്രമായ യെദിയോത്ത് അഹ്‌റോനോത്ത് ഉടമയുമായി രഹസ്യ കരാറിലേര്‍പ്പെട്ടു തുടങ്ങിയ ആരോപണങ്ങളില്‍ നെതന്യാഹുവിനെ പൊലിസ് ചോദ്യം ചെയ്തിരുന്നു. എന്നാല്‍, കേസില്‍ തുടരന്വേഷണം വൈകുന്നുവെന്നു കാണിച്ചാണു പ്രതിഷേധക്കാര്‍ തലസ്ഥാനത്ത് തടിച്ചുകൂടിയത്.