വെല്ലിങ്ടന്‍: ന്യൂസിലന്‍ഡിനെതിരായ ഒന്നാം ക്രിക്കറ്റ് ടെസ്റ്റില്‍ വെസ്റ്റിന്‍ഡീസ് പൊരുതുന്നു. വിന്‍ഡീസിന്റെ ഒന്നാം ഇന്നിങ്‌സ് വെറും 134 റണ്‍സില്‍ അവസാനിപ്പിച്ച കിവീസ് ഒന്നാം ഇന്നിങ്‌സില്‍ ഒന്‍പതിന് 520 റണ്‍സെടുത്ത് ഡിക്ലയര്‍ ചെയ്ത് 386 റണ്‍സിന്റെ മികച്ച ലീഡ് സ്വന്തമാക്കിയിരുന്നു. രണ്ടാം ഇന്നിങ്‌സ് തുടങ്ങിയ വിന്‍ഡീസ് മൂന്നാം ദിനം കളി നിര്‍ത്തുമ്പോള്‍ രണ്ട് വിക്കറ്റ് നഷ്ടത്തില്‍ 214 റണ്‍സെന്ന നിലയില്‍. ഇന്നിങ്‌സ് പരാജയം ഒഴിവാക്കി ലീഡ് നേടാന്‍ വിന്‍ഡീസ് പൊരുതുന്നു. എട്ട് വിക്കറ്റ് ശേഷിക്കെ കിവി സ്‌കോറിനൊപ്പമെത്താന്‍ വിന്‍ഡീസിന് 172 റണ്‍സ് കൂടി വേണം. 79 റണ്‍സുമായി ബ്രാത്‌വെയ്റ്റ് ക്രീസില്‍. നേരത്തെ വാലറ്റത്ത് അരങ്ങേറ്റക്കാരന്‍ ബ്ലന്‍ഡല്‍ (107), ഗ്രാന്‍ഡ് ഹോം (105) എന്നിവര്‍ നേടിയ സെഞ്ച്വറികളുടെ കരുത്തിലാണ് ന്യൂസിലന്‍ഡ് മികച്ച സ്‌കോര്‍ സ്വന്തമാക്കിയത്.