കൊച്ചി: കരകൗശല നിര്‍മാണത്തില്‍ താത്പര്യമുണ്ടോ, എങ്കില്‍ നേരെ മറൈന്‍ ഡ്രൈവിലേക്ക് ചെല്ലാം. 50 രൂപക്ക് മുള കൊണ്ടുള്ള കരകൗശല വസ്തുക്കള്‍ നിര്‍മിക്കാനുള്ള പരിശീലനം ലഭിക്കും. മറൈന്‍ ഡ്രൈവില്‍ നടക്കുന്ന കേരള ബാംബൂ ഫെസ്റ്റ് 2017ന്റെ ഭാഗമായാണ് താത്പര്യമുള്ളവര്‍ക്ക് മുള കൊണ്ടുള്ള കരകൗശല നിര്‍മ്മാണത്തില്‍ പരിശീലനം നേടാന്‍ കേരള ബാംബൂ മിഷന്‍ അവസരമൊരുക്കുന്നത്.

14 വര്‍ഷമായി നടക്കുന്ന ബാംബൂ ഫെസ്റ്റില്‍ ഇതാദ്യമായാണ് മുള കൊണ്ട് കരകൗശല വസ്തുക്കള്‍ നിര്‍മിക്കാന്‍ പരിശീലനം നേടാന്‍ സന്ദര്‍ശകര്‍ക്ക് അവസരം ലഭിക്കുന്നത്. സന്ദര്‍ശന സമയമായ രാവിലെ 11 മണി മുതല്‍ രാത്രി 9 മണി വരെ പരിശീലനം ലഭിക്കും. ബാംബൂ മിഷന്റെ കീഴിലുള്ള അങ്കമാലിയിലെ ബാംബൂ ഇന്നവേഷന്‍ സെന്ററിലെ പരിശീലകരുടെ നേതൃത്വത്തിലാണ് കുട്ട, ഫ്രൂട്ട് ബാസ്‌ക്കറ്റ്, പെന്‍ ഹോള്‍ഡര്‍, ഫ്‌ളവര്‍ വാസ്, മെഴുകുതിരി സ്റ്റാന്‍ഡ് എന്നിവ നിര്‍മിക്കാനുള്ള പരിശീലനം നല്‍കുന്നത്.

ഇതിന് പുറമെ, നിത്യോപയോഗ സാധനങ്ങള്‍ മുതല്‍ ഗൃഹ നിര്‍മ്മാണത്തിനുള്ള സാമഗ്രികള്‍ വരെ പ്രദര്‍ശിപ്പിച്ച 155 സ്റ്റാളുകളാണ് ഇത്തവണ ബാംബൂ ഫെസ്റ്റില്‍ ഒരുക്കിയിരിക്കുന്നത്. പ്രവേശനം സൗജന്യമാണ്.