തലശ്ശേരി: പിണറായി ഓലയമ്പലത്തെ ആര്‍.എസ്.എസ്. പ്രവര്‍ത്തകന്‍ കൊല്ലനാണ്ടിയില്‍ രമിത്ത് (26) വധക്കേസില്‍ പിടിയിലാകാനുള്ള രണ്ടു പ്രതികളും കീഴടങ്ങി. കേസ് തലശ്ശേരി ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതി സെഷന്‍സ് കോടതിയിലേക്ക് മാറ്റി.
ഇതുവരെ ഒളിവില്‍ കഴിയുകയായിരുന്ന സി.പി.എം പ്രവര്‍ത്തകരായ പിണറായി തെരുവിലെ തടിയന്‍ രജീഷ് എന്ന രജീഷ് (26), പിണറായി കണ്ണാടിമുക്കിലെ പ്രദീപത്തില്‍ കെ.തേജസ് (25) എന്നിവരാണ് ഇന്നലെ ധര്‍മടം പൊലിസില്‍ കീഴടങ്ങിയത്. ഇരുവര്‍ക്കുമെതിരേ കോടതി അറസ്റ്റ് വാറണ്ട് പുറപ്പെടുവിച്ചിരുന്നു.
സ്റ്റേഷനില്‍ അറസ്റ്റ് രേഖപ്പെടുത്തിയ ശേഷം പൊലിസ് ഇവരെ ജുഡീഷ്യല്‍ ഒന്നാം ക്ലാസ് മജിസ്‌ട്രേട്ട് കോടതില്‍ ഹാജരാക്കി. രണ്ടു പേരെയും റിമാന്‍ഡ് ചെയ്ത് ജയിലിലടച്ചു. രമിത്ത് കേസില്‍ 15 പേരാണ് പ്രതിസ്ഥാനത്തുള്ളത്.