മുംബൈ: റിസര്‍വ് ബാങ്കിന്റെ ദ്വൈമസ പണ, വായ്പാനയ അവലോകന യോഗം ഇന്നും നാളെയുമായി ദിവസങ്ങളില്‍ നടക്കും. നാളെ വൈകീട്ടോടെയാണ് നയം പ്രഖ്യാപിക്കുക.

അടിസ്ഥാന നിരക്കുകളില്‍ മാറ്റം വരില്ലെന്നാണ് കരുതുന്നത്. നാണ്യപ്പെരുപ്പ നിരക്കു വര്‍ധിക്കാനുള്ള വളരെ ശക്തമായ സാധ്യതയാണു വായ്പ നിരക്കുകളില്‍ ഇളവു പ്രഖ്യാപിക്കുന്നതില്‍ നിന്നും ആര്‍.ബി.ഐയെ പിന്തിരിപ്പിക്കുന്നത്.

ഉപഭോക്തൃ വില സൂചികയെ അടിസ്ഥാനമാക്കിയുള്ള നാണ്യപ്പെരുപ്പ നിരക്ക് നിലവില്‍ 3.58 ശതമാനമാണ്. നിരക്ക് വൈകാതെതന്നെ നാലു ശതമാനത്തിലേക്ക് നീങ്ങുമെന്നാണ് കണക്കുകൂട്ടല്‍.

നടപ്പുസാമ്പത്തിക വര്‍ഷത്തിന്റെ അവസാനത്തോടെ 4.5 ശതമാനം വരെ ഉയര്‍ന്നേക്കാവുന്ന നാണ്യപ്പെരുപ്പ നിരക്ക് അടുത്ത വര്‍ഷം കൂടുതല്‍ ഉയരത്തിലേക്കു നീങ്ങാനുള്ള സാധ്യതയും ആര്‍.ബി.ഐ കണക്കിലെടുക്കേണ്ടതുണ്ട്.