മുംബൈ: കേരളം, തമിഴ്‌നാട്, ലക്ഷദ്വീപ് തീരങ്ങളില്‍ വന്‍നാശനഷ്ടങ്ങള്‍ക്കിടയാക്കിയ ഓഖി ചുഴലിക്കൊടുങ്കാറ്റ് മഹാരാഷ്ട്ര തീരത്തോടടുത്തു. മുംബൈ തീരത്തു നിന്ന് 300 കി.മീറ്റര്‍ പടിഞ്ഞാറുമാറി കടലില്‍ രൂപംകൊണ്ട ചുഴലിക്കാറ്റിനെ തുടര്‍ന്ന് മുംബൈ നഗരത്തില്‍ തിങ്കളാഴ്ച രാത്രി തുടങ്ങിയ കനത്ത മഴ തുടരുകയാണ്.
കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിനെ തുടര്‍ന്ന് മഹാരാഷ്ട്രയിലെ മുംബൈ ഉള്‍പ്പെടെയുള്ള തീരമേഖലയിലെ വിദ്യാഭ്യാസ സ്ഥാപനങ്ങള്‍ക്ക് സര്‍ക്കാര്‍ അവധി നല്‍കി. മുംബൈ, സിന്ധുദുര്‍ഗ, താനെ, റായ്ഗഡ്, പല്‍ഗാര്‍ ജില്ലകളിലെ വിദ്യാഭ്യാസ സ്ഥാപനങ്ങള്‍ക്കാണ് അവധി നല്‍കിയതെന്ന് മന്ത്രി വിനോദ് താവ്‌ദെ അറിയിച്ചു. മഹാരാഷ്ട്രക്കുപുറമെ ഗുജറാത്തിലും ശക്തമായ മഴ തുടങ്ങിയിട്ടുണ്ട്. ചുഴലിക്കാറ്റിനെ തുടര്‍ന്ന് ഇന്നലെ രാവിലെ മുംബൈ-പൂനെ എക്‌സ്പ്രസ് ഹൈവേയില്‍ ഗതാഗതം താല്‍ക്കാലികമായി നിര്‍ത്തിവച്ചിരുന്നു. സുരക്ഷയുടെ ഭാഗമായി എല്ലാ തരത്തിലുള്ള മുന്‍കരുതലുകളോടെയുമാണ് ട്രെയിന്‍ സര്‍വിസ് നടത്തുന്നതെന്ന് പശ്ചിമ റെയില്‍വേ അധികൃതര്‍ അറിയിച്ചു.
അതിനിടെ, റായ്ഗഡില്‍ നിന്ന് മത്സ്യബന്ധനത്തിന് പോയ നാലുപേരെ കാണാതായതായി റിപ്പോര്‍ട്ടുണ്ട്. ഇവരെ കണ്ടെത്തുന്നതിനായി തിരച്ചില്‍ ഊര്‍ജിതമാക്കിയതായി സര്‍ക്കാര്‍ അറിയിച്ചു. ബീച്ച് സന്ദര്‍ശനത്തിന് പൊലിസ് നിരോധനമേര്‍പ്പെടുത്തിയിട്ടുണ്ട്.
കനത്ത മഴതുടരുന്ന ഗുജറാത്തില്‍ മണ്ണിടിച്ചിലുണ്ടായേക്കുമെന്ന് മുന്നറിയിപ്പുണ്ട്. തീരമേഖലയില്‍ രക്ഷാപ്രവര്‍ത്തനത്തിന് പ്രധാനമന്ത്രി നരേന്ദ്ര മോദി ജനങ്ങളോട് അഭ്യര്‍ഥിച്ചു. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെ മോര്‍ബി, ധരങ്ധര, സുരേന്ദ്ര നഗര്‍ എന്നിവിടങ്ങളില്‍ നടത്താനിരുന്ന തെരഞ്ഞെടുപ്പ് റാലി റദ്ദാക്കി.
ബി.ജെ.പി അധ്യക്ഷന്‍ അമിത് ഷാ, യു.പി മുഖ്യമന്ത്രി യോഗി ആദിത്യ നാഥ് അടക്കമുള്ള നേതാക്കളുടെ സൗരാഷ്ട്ര തീരമേഖലയോടു ചേര്‍ന്ന രാജുല, മാഹുവ, സിഹോര്‍ എന്നിവിടങ്ങളില്‍ നടത്താനിരുന്ന തെരഞ്ഞെടുപ്പ് റാലികളും റദ്ദാക്കി.
ജനങ്ങള്‍ രാത്രിയില്‍ പുറത്തിറങ്ങരുതെന്നും കുടിലുകളില്‍ കഴിയുന്നവര്‍ സുരക്ഷിതമായ സ്ഥലങ്ങളിലേക്ക് മാറണമെന്നും സൂറത്ത് ജില്ലാ കലക്ടര്‍ മഹേന്ദ്ര പട്ടേല്‍ നിര്‍ദേശിച്ചു. സൂറത്ത്, സൗരാഷ്ട്ര എന്നിവിടങ്ങളില്‍ ദേശീയ ദുരന്ത നിവാരണ സേനയെ രംഗത്തിറക്കിയിട്ടുണ്ട്. നാലുദിവസം കൂടി ഗുജറാത്തില്‍ കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. വല്‍സദ്, സൂറത്ത്, നവ്‌സാരി, ബറൂച്ച്. ദാങ്, താപി, അംറേലി, ഗിര്‍-സോനാത്ത്, ബാവ്‌നഗര്‍ ജില്ലകളില്‍ ഇന്നലെ കനത്തമഴയുണ്ടായി.