ചെറുവത്തൂര്‍: സംസ്ഥാന സ്‌കൂള്‍ കായിക മേളയ്ക്ക് കഴിഞ്ഞ വര്‍ഷം കൊടിയിറങ്ങിയപ്പോള്‍ കാസര്‍കോട്ടുകാരെല്ലാം തലകുനിച്ചു നില്‍ക്കേണ്ടി വന്നു. മേളയുടെ സ്‌കോര്‍ ബോര്‍ഡ് ചൂണ്ടി കേരളത്തില്‍ ജില്ലകള്‍ പതിമൂന്നാണോയെന്നും മറ്റു ജില്ലക്കാര്‍ പരിഹസിച്ചു.
ഒരു പോയന്റുപോലും നേടാന്‍ കഴിയാത്തതിന്റെ നാണക്കേട് ഇനിയും മാറിയിട്ടില്ല. കുട്ടികളല്ല ഇവിടെ കുറ്റക്കാര്‍. കഴിവുണ്ടായിട്ടും കാര്യമായ പരിശീലനമോ, പരിശീലന സൗകര്യമോ ഇല്ലാത്തതിനാല്‍ മാത്രം നേട്ടം കൊയ്യാനാകാതെ മടങ്ങേണ്ടി വന്നവരാണവര്‍. ഇത്തവണയും കായിക മേളകള്‍ക്ക് അരങ്ങൊരുങ്ങുകയാണ്. ജില്ലയിലെ കായിക പ്രേമികള്‍ക്ക് ഒരപേക്ഷയെ ഉള്ളൂ... വട്ടപ്പൂജ്യം വാങ്ങി ജില്ലയ്ക്ക് നാണക്കേടുണ്ടാക്കാന്‍ ഇടവരുത്തരുത്.