ന്യൂഡല്‍ഹി: മൂന്നരവര്‍ഷത്തിനിടെ നരേന്ദ്രമോദി സര്‍ക്കാര്‍ പരസ്യങ്ങള്‍ക്കായി മാത്രം ചെലവിട്ടത് 3,755 കോടി രൂപ. 2014ല്‍ അധികാരത്തിലേറിയതുമുതല്‍ കഴിഞ്ഞ ഒക്ടോബര്‍വരെയുള്ള കാലയളവിലാണ് ഇത്രയും തുക പരസ്യത്തിനായി ചെലവഴിച്ചത്.
വിവരാവകാശ നിയമപ്രകാരമുള്ള അപേക്ഷയ്ക്ക് ലഭിച്ച മറുപടിയിലാണ് ഇക്കാര്യങ്ങള്‍ പുറത്തുവന്നത്. 2014 ഏപ്രില്‍ മുതല്‍ 2017 വരെയുള്ള കാലത്ത് ഇലക്ട്രോണിക്- അച്ചടി മാധ്യമങ്ങള്‍ക്കും പുറം പരസ്യങ്ങള്‍ക്കുമായി 37,54,06,23,616 രൂപ ചെലവഴിച്ചതായാണ് വിവരാവകാശ രേഖയില്‍ പറയുന്നത്. നോയിഡ സ്വദേശിയായ വിവരാവകാശ പ്രവര്‍ത്തകന്‍ രാംവീര്‍ തന്‍വാറിന് ആണ് ഇതുസംബന്ധിച്ച മറുപടി ലഭിച്ചത്.
അധികാരത്തിലേറിയ ശേഷം എത്രതുക പരസ്യങ്ങള്‍ക്കായി ചെലവഴിച്ചെന്നായിരുന്നു കേന്ദ്ര വാര്‍ത്താവിതരണ പ്രക്ഷേപണ മന്ത്രാലയത്തോട് രാംവീര്‍ ചോദിച്ചത്. റേഡിയോ, സിനിമ, ഇന്റര്‍നെറ്റ്, ടെലിവിഷന്‍, മൊബൈല്‍ഫോണ്‍ സന്ദേശം എന്നിങ്ങനെയുള്ള ഇലക്ട്രോണിക് പരസ്യങ്ങള്‍ക്കായി 1,656 കോടി രൂപ ചെലവഴിച്ചപ്പോള്‍ അച്ചടിമാധ്യമങ്ങളിലൂടെ 1,698 കോടിയുടെ പരസ്യങ്ങളും ഹോര്‍ഡിങ്‌സ്, പോസ്റ്ററുകള്‍, ലഖുലേഖകള്‍, കലണ്ടറുകള്‍, മറ്റുപൊതുസ്ഥലങ്ങളിലുള്ള പരസ്യങ്ങള്‍ക്കുമായി 399 കോടി രൂപയും ചെലവിട്ടതായി വാര്‍ത്താവിതരണ പ്രക്ഷേപണ മന്ത്രാലയം അറിയിച്ചു.