കൊല്ലം: ബസില്‍ മോഷണം നടത്തിയെന്ന് ആരോപിച്ച് കാഴ്ചക്കുറവുള്ള യുവാവിന് പൊലിസിന്റെ ക്രൂര മര്‍ദനം. കൊല്ലം പോളയത്തോട് വയലില്‍ തോപ്പില്‍ ഷിബുവിനാണ് (37) മര്‍ദനമേറ്റത്. പരുക്കേറ്റ ഇയാളെ ജില്ലാ ആശുപത്രിയില്‍ പ്രവേശിപ്പിച്ചു.
വെള്ളിയാഴ്ച കല്ലമ്പലത്തായിരുന്നു സംഭവം. ഇരുകണ്ണിനും കാഴ്ചക്കുറവുള്ള ഷിബു തൈലം വിറ്റാണ് ഉപജീവനം നടത്തിയിരുന്നത്. ഇന്നലെ രാവിലെ കച്ചവടത്തിനായി കല്ലമ്പലത്തെത്തിയ ഇയാളെ പൊലിസ് പിടിച്ചുകൊണ്ടുപോയി മര്‍ദിക്കുകയായിരുന്നുവെന്നാണ് പരാതി. സ്റ്റേഷനിലെത്തിയപ്പോള്‍ അസഭ്യവര്‍ഷത്തോടെയായിരുന്നു എസ്.ഐയുടെ ചോദ്യംചെയ്യല്‍. ഇതിനുപിന്നാലെ ഒരു പൊലിസുകാരന്‍ മുതുകിന് ഇടിക്കുകയും അടിവയറ്റിന് തൊഴിക്കുകയും ചെയ്തു. തുടര്‍ന്ന് കല്ലമ്പലത്തെ സി.പി.എം പ്രവര്‍ത്തകര്‍ എത്തിയാണ് ഷിബുവിനെ മോചിപ്പിച്ച് വീട്ടിലെത്തിച്ചത്. രാത്രി വയറുവേദന അനുഭവപ്പെട്ടതിനെ തുടര്‍ന്ന് കൊല്ലം ജില്ലാ ആശുപത്രിയില്‍ യുവാവ് ചികിത്സ തേടുകയായിരുന്നു.
ഷിബു ഉദരസംബന്ധമായ രോഗത്തിന് ഒരുമാസം മുന്‍പ് ശസ്ത്രക്രിയക്ക് വിധേയനായിരുന്നു. കാഴ്ച ശക്തിയില്ലാത്ത ആളാണെന്നും ഓപറേഷന്‍ അടുത്തിടെ കഴിഞ്ഞതാണെന്നും പൊലിസിനെ അറിയിച്ചെങ്കിലും മര്‍ദനം തുടരുകയായിരുന്നുവെന്ന് ഷിബു പറഞ്ഞു. സംഭവത്തില്‍ ഉന്നത പൊലിസ് അധികാരികള്‍ക്കും മനുഷ്യാവകാശ കമ്മിഷനും പരാതി നല്‍കാനുള്ള ഒരുക്കത്തിലാണ് ഷിബുവിന്റെ ബന്ധുക്കള്‍.