സര്‍ക്കാര്‍ സേവനങ്ങള്‍ ഒറ്റ പ്ലാറ്റ്‌ഫോമില്‍ ലഭ്യമാക്കി ഉമങ് (യൂനിഫൈഡ് മൊബൈല്‍ അപ്ലിക്കേഷന്‍ ഫോര്‍ ന്യൂ ഏജ് ഗവേണന്‍സ്) ആപ്പ് തരംഗമാകുന്നു. പ്രധാനമന്ത്രി നരേന്ദ്രമോദിയാണ് മൊബൈല്‍ ആപ്പ് പുറത്തിറക്കിയത്. കഴിഞ്ഞ ഡിസംബറില്‍ ആപ്പ് പുറത്തിറങ്ങുമെന്നായിരുന്നു പ്രതീക്ഷിച്ചിരുന്നത്. ആധാര്‍ ഡിജിലോക്ക്, ഭാരത് ബില്‍ പെയ്‌മെന്റ് സിസ്റ്റം (ബി.പി.പി.എസ്) തുടങ്ങിയ സേവനങ്ങള്‍ ആപ്പില്‍ ലഭ്യമാണ്. ഈ സേവനങ്ങളെല്ലാം ഒന്നിച്ച് ഈ ആപ്പിലൂടെ ലഭിക്കുമെന്നതാണ് ഉമങിനെ ജനപ്രിയമാക്കിയത്. വ്യത്യസ്ത സര്‍ക്കാര്‍ സംവിധാനങ്ങളുടെ 1200ഓളം സേവനങ്ങളാണ് ഉമങ്ങില്‍ ലഭിക്കുക. 

കേന്ദ്ര-സംസ്ഥാന സര്‍ക്കാരുകളുടെ സേവനങ്ങളും ആവശ്യസേവനങ്ങള്‍ക്ക് ബില്ലടക്കുന്നതും ഇവയില്‍ ഉള്‍പ്പെടും. ആപ്പ് വഴി എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്‍ (ഇ.പി.എഫ്.ഒ) സേവനങ്ങള്‍ ലഭ്യമാക്കുകയും പുതിയ പാന്‍ കാര്‍ഡിന് അപേക്ഷിക്കുകയും പ്രധാന്‍മന്ത്രി കൗശല്‍ വികാസ് യോജനയ്ക്ക് കീഴില്‍ ജോലിക്കായി പേര് രജിസ്റ്റര്‍ ചെയ്യുകയും ചെയ്യാം.

13 ഇന്ത്യന്‍ ഭാഷകളില്‍ ആപ്പ് ലഭ്യമാണ്. താമസിയാതെ തന്നെ യു.എസ്.എസ്.ഡി അടിസ്ഥാനമാക്കി ഇന്റര്‍നെറ്റ് സൗകര്യമില്ലാത്ത ഫോണുകളിലും ഈ ആപ്പ് കൊണ്ടുവരും. നിലവില്‍ നാല് സംസ്ഥാനങ്ങളും 33 വിഭാഗങ്ങളും 162 സേവനങ്ങളും ആപ്പില്‍ സജീവമായി നില്‍ക്കുന്നുണ്ട്. ആന്‍ഡ്രോയ്ഡ്, ഐ.ഒ.എസ്, വിന്‍ഡോസ് ഫോണുകളില്‍ ലഭിക്കും.