ന്യൂഡല്‍ഹി: രാജ്യത്തെ നിലവിലെ പ്രത്യേക രാഷ്ട്രീയസാഹചര്യത്തില്‍ കോണ്‍ഗ്രസുമായി സഹകരിക്കുന്നതു സംബന്ധിച്ച വിഷയത്തില്‍ സി.പി.എം നേതൃത്വത്തില്‍ രൂപപ്പെട്ട ഭിന്നതക്ക് അയവില്ല.
ഇക്കാര്യം ചര്‍ച്ചചെയ്യാന്‍ ഡല്‍ഹിയില്‍ ചേര്‍ന്ന രണ്ടുദിവസത്തെ പൊളിറ്റ്ബ്യൂറോ യോഗം തീരുമാനമാവാതെ പിരിഞ്ഞു. ബി.ജെ.പിയെ അധികാരത്തില്‍ നിന്നു മാറ്റിനിര്‍ത്തുക എന്ന ലക്ഷ്യത്തിനു വേണ്ടിയാണെങ്കിലും കോണ്‍ഗ്രസുമായി ധാരണ പോലും വേണ്ടെന്ന നിലപാടിനു മുന്‍തൂക്കം ലഭിച്ച പി.ബി യോഗത്തില്‍, കോണ്‍ഗ്രസുമായി നേരിട്ടു സഖ്യമുണ്ടാക്കാതെ അടവുനയം വേണമെന്ന ജനറല്‍ സെക്രട്ടറി സീതാറാം യെച്ചൂരിയുടെ നിലപാട് തള്ളി.
കോണ്‍ഗ്രസുമായി പ്രത്യക്ഷത്തില്‍ ധാരണ പോലും വേണ്ടെന്ന മുന്‍ ജനറല്‍സെക്രട്ടറി പ്രകാശ് കാരാട്ടിന്റെ നിലപാടിനാണ് പി.ബിയില്‍ ഭൂരിപക്ഷപിന്തുണ ലഭിച്ചത്. വ്യത്യസ്ത അഭിപ്രായമുയര്‍ന്നതോടെ ഇരുവരുടെയും നിലപാടുകള്‍ കേന്ദ്രകമ്മിറ്റിക്കു വിട്ടു.
കൊല്‍ക്കത്തയില്‍ അടുത്തമാസം 19 മുതല്‍ 21 വരെ ചേരുന്ന കേന്ദ്രകമ്മിറ്റി യോഗം ഇക്കാര്യം വീണ്ടും ചര്‍ച്ചചെയ്യും. ഇതുസംബന്ധിച്ച അന്തിമ തീരുമാനവും കേന്ദ്രകമ്മിറ്റിയുടേതാകും.
കഴിഞ്ഞ പി.ബിയും പിന്നീട് കേന്ദ്രകമ്മിറ്റിയും തള്ളിയതോടെയാണ് ഇക്കാര്യത്തില്‍ കേന്ദ്ര കമ്മിറ്റി ചുമതലപ്പെടുത്തിയതു പ്രകാരം അഭിപ്രായ സമന്വയമുണ്ടാക്കാനാണ് രണ്ടുദിവസത്തെ പൊളിറ്റ്ബ്യൂറോ യോഗം ചേര്‍ന്നത്. എന്നാല്‍ ഇരുപക്ഷവും നിലപാടില്‍ ഉറച്ചുനിന്നതോടെ കോണ്‍ഗ്രസ് വിഷയത്തില്‍ സി.പി.എം ദേശീയ നേതൃത്വത്തില്‍ രൂപപ്പെട്ട ഭിന്നത പരിഹരിക്കാനായില്ല. മുന്‍ നിലപാടില്‍ യെച്ചൂരി അയവുവരുത്തിയെങ്കിലും കാരാട്ട് പക്ഷം നിലപാടില്‍ ഉറച്ചുനിന്നു. ദേശീയതലത്തില്‍ സഖ്യമുണ്ടാക്കണമെന്ന നിലപാട് മയപ്പെടുത്തി സംസ്ഥാനതലങ്ങളില്‍ പ്രാദേശിക പാര്‍ട്ടികളുമായി കോണ്‍ഗ്രസ് സഖ്യമുണ്ടാക്കിയിട്ടുണ്ടെങ്കിലും അതിന്റെ ഭാഗമായി ബി.ജെ.പിക്കെതിരേ മത്സരിക്കണമെന്ന നിലപാടാണ് യെച്ചൂരി സ്വീകരിച്ചത്. എന്നാല്‍ കോണ്‍ഗ്രസുമായി സഖ്യമുണ്ടാക്കാനുള്ള കുറുക്കുവഴിയായി ഇതുമാറുമെന്ന് ചൂണ്ടിക്കാട്ടി കോണ്‍ഗ്രസുമായി യാതൊരുവിധ ചര്‍ച്ചയും പാടില്ലെന്ന നിലപാടില്‍ വിട്ടുവീഴ്ചയില്ലെന്ന് കാരാട്ട് പക്ഷം വ്യക്തമാക്കി. സംസ്ഥാന രാഷ്ട്രീയത്തില്‍ കോണ്‍ഗ്രസ് പ്രധാനശത്രുവായതിനാല്‍ കേരളാ ഘടകം കാരാട്ടിനൊപ്പമാണ്.