ആലപ്പുഴ: ഇതര സംസ്ഥാനങ്ങളെ അപേക്ഷിച്ച് കേരളത്തില്‍ മനുഷ്യാവകാശ ലംഘനങ്ങള്‍ കുറവാണെന്ന് കേരള ഹൈക്കോടതി ആക്ടിങ് ചീഫ് ജസ്റ്റിസ് ആന്റണി ഡൊമിനിക്. മനുഷ്യാവകാശ കമ്മിഷന്റെ ഇടപെടലുകളും രാഷ്ട്രീയമായ ബോധവല്‍ക്കരണവുമാണ് ഇതിനു കാരണമെന്ന് അദ്ദേഹം പറഞ്ഞു. സംസ്ഥാന മനുഷ്യാവകാശ കമ്മിഷന്‍ സംഘടിപ്പിച്ച ആഗോള മനുഷ്യാവകാശ ദിനാചരണം ആലപ്പുഴ എസ്.ഡി കോളജ് ഓഡിറ്റോറിയത്തില്‍ ഉദ്ഘാടനം ചെയ്യുകയായിരുന്നു അദ്ദേഹം.
രാജ്യത്തെ ഏറ്റവും മികച്ച മനുഷ്യാവകാശ കമ്മിഷനാണ് കേരളത്തിലുള്ളത്. മനുഷ്യാവകാശ ലംഘനങ്ങള്‍ സംബന്ധിച്ച കേസുകള്‍ കൈകാര്യം ചെയ്യുന്നതിന് ജില്ലാ ജഡ്ജിമാര്‍ക്ക് കൂടുതല്‍ പരിശീലനം നല്‍കാന്‍ കേരള ജുഡിഷ്യല്‍ അക്കാദമിക്ക് നിര്‍ദേശം നല്‍കും. സ്വാതന്ത്ര്യത്തിനു മുന്‍പ് തന്നെ മനുഷ്യാവകാശ സംരക്ഷണ ചിന്തകള്‍ നമ്മുടെ നാട്ടില്‍ സജീവമായിരുന്നു. മുന്‍തലമുറ മനുഷ്യാവകാശ സംരക്ഷണത്തില്‍ തീര്‍ത്തും ബോധവാന്‍മാരായിരുന്നു.
അവര്‍ക്കുണ്ടായിരുന്ന മനുഷ്യാവകാശ സംരക്ഷണ ചിന്തകള്‍ പിന്നീട് ഭരണഘടനയില്‍ ക്രോഡീകരിച്ചിട്ടുണ്ടെന്നും ജസ്റ്റിസ് പറഞ്ഞു.