നാഗ്പൂര്‍:ദലിത്-പിന്നോക്ക ജനവിഭാഗങ്ങള്‍ക്കെതിരായ അക്രമം അവസാനിപ്പിക്കണമെന്ന് ബി.ജെ.പി-സംഘ്പരിവാര്‍ നേതൃത്വങ്ങള്‍ക്ക് മുന്നറിയിപ്പുമായി ബി.എസ്.പി അധ്യക്ഷ മായാവതി.
ദലിത് -പിന്നോക്ക അക്രമം അവസാനിപ്പിച്ചിട്ടില്ലെങ്കില്‍ തങ്ങളെല്ലാം ഹിന്ദുമതം വിട്ട് ബുദ്ധമതത്തില്‍ ചേരുമെന്നും അവര്‍ വ്യക്തമാക്കി.
നാഗ്പൂരിലെ ആര്‍.എസ്.എസ് കാര്യാലയത്തിനടുത്ത് നടന്ന ബി.എസ്.പി സമ്മേളനത്തിലാണ് മായവതിയുടെ മുന്നറിയിപ്പ്. 1935ല്‍ അംബേദ്കര്‍ പറഞ്ഞിരുന്നു, താന്‍ ജനിച്ചത് ഹിന്ദുവായിട്ടാണെങ്കിലും മരിക്കുന്നത് അങ്ങനെയായിരിക്കില്ലെന്ന്. അദ്ദേഹത്തിന്റെ തീരുമാനത്തില്‍ നിന്ന് അദ്ദേഹത്തിന് മാറാന്‍ കഴിഞ്ഞിരുന്നില്ല. 1956ല്‍ നാഗ്പൂരില്‍ വച്ച് അദ്ദേഹം ബുദ്ധമതത്തിലേക്ക് മാറി.
ഹിന്ദുമതത്തിനെ കരാറെടുത്തവരും കസ്റ്റഡിയില്‍ വച്ചവരും അവരുടെ മനോഭാവത്തില്‍ മാറ്റം വരുത്താന്‍ തയാറാകണം. ദലിത്-പിന്നോക്ക വിഭാഗം ജനങ്ങളെ മാനിക്കാനും അവര്‍ക്കെതിരായി നടത്തുന്ന ചൂഷണം അവസാനിപ്പിക്കാനും ബി.ജെ.പിയും സംഘ് പരിവാറും തയാറാകണമെന്നും അവര്‍ ആവശ്യപ്പെട്ടു. ഇല്ലെങ്കില്‍ തനിക്കൊപ്പം കോടിക്കണക്കിന് വരുന്ന ദലിതുകള്‍ ബുദ്ധമതം സ്വീകരിക്കാന്‍ നിര്‍ബന്ധിതരാകും. അനുയോജ്യമായ ഒരു സമയം എത്തുന്നതോടെ അംബേദ്കര്‍ സ്വീകരിച്ചതുപോലുള്ള നിലപാടിലേക്കായിരിക്കും തങ്ങളും നീങ്ങുകയെന്നും മായാവതി പറയുന്നു.
2014ലെ തെരഞ്ഞെടുപ്പുമുതല്‍ ഇലക്ട്രോണിക് വോട്ടിങ് യന്ത്രത്തില്‍ ബി.ജെ.പി ക്രമക്കേട് നടത്തുന്നുണ്ട്. ലോക്‌സഭാ തെരഞ്ഞെടുപ്പ് നേരത്തെയാകുമെന്നും പ്രവര്‍ത്തകരെല്ലാം ഒരുങ്ങിയിരിക്കണമെന്നും അവര്‍ ആവശ്യപ്പെട്ടു. ലോക്‌സഭാ തെരഞ്ഞെടുപ്പിനുമുന്‍പ് വൈകാരികത ഇളക്കിവിടാനായി ബി.ജെ.പി രാമക്ഷേത്ര നിര്‍മാണം തുടങ്ങും.
ദേശസ്‌നേഹത്തിന്റെ സംരക്ഷകരെന്ന് വ്യക്തമാക്കി മോദിയും ബി.ജെ.പിയും അവരുടെ വീഴ്ചകള്‍ മറികടക്കാന്‍ ശ്രമം നടത്തുമെന്നും അതുകൊണ്ട് അവരുടെ ഗൂഢാലോചന സംബന്ധിച്ച് ജനങ്ങള്‍ ജാഗ്രത പാലിക്കണമെന്നും മായാവതി കൂട്ടിച്ചേര്‍ത്തു.