ധാക്ക: വെടിക്കെട്ട് ബാറ്റിങുമായി ക്രിസ് ഗെയ്ല്‍ നിറഞ്ഞാടിയ മത്സരത്തില്‍ ധാക്ക ഡൈനാമൈറ്റ്‌സിനെ 57 റണ്‍സിന് തകര്‍ത്ത് രംഗ്പൂര്‍ റൈഡേഴ്‌സ് കന്നി കിരീടത്തില്‍ മുത്തമിട്ടു. രംഗ്പൂരിന്റെ 207 റണ്‍സ് വിജയലക്ഷ്യം പിന്തുടര്‍ന്ന ഡൈനാമൈറ്റ്‌സിന് നിശ്ചിത ഓവറില്‍ ഒന്‍പതു വിക്കറ്റ് നഷ്ടത്തില്‍ 149 റണ്‍സെടുക്കാനേ സാധിച്ചുള്ളൂ.
നിര്‍ണായകമായ ഫൈനലില്‍ ടോസ് നേടിയിട്ടും രംഗ്പൂരിനെ ബാറ്റിങിനയക്കുകയായിരുന്നു ഡൈനാമൈറ്റ്‌സ്. ജോണ്‍സണ്‍ ചാള്‍സ്(3) തുടക്കത്തില്‍ പുറത്തായെങ്കിലും പിന്നീടങ്ങോട്ട് ഡൈനാമൈറ്റ്‌സ് ചിത്രത്തിലേ ഇല്ലായിരുന്നു. 69 പന്തില്‍ 18 സിക്‌സറും അഞ്ചു ബൗണ്ടറിയുമായി ഗെയ്ല്‍(146*) താണ്ഡവമാടുകയായിരുന്നു. ഒരിന്നിങ്‌സില്‍ ഏറ്റവുമധികം സിക്‌സറടിക്കുന്ന താരമെന്ന സ്വന്തം റെക്കോര്‍ഡും ഗെയ്ല്‍ തിരുത്തി.
നേരത്തെ പൂനെ വാരിയേഴ്‌സിനെതിരേ 2013ല്‍ 17 സിക്‌സറടിച്ചതായിരുന്നു റെക്കോര്‍ഡ്. ബ്രണ്ടന്‍ മക്കല്ലം(51*) ഗെയ്‌ലിന് മികച്ച പിന്തുണ നല്‍കി. നാലു ബൗണ്ടറിയും മൂന്നു സിക്‌സറും മക്കല്ലം അടിച്ചു.
മറുപടി ബാറ്റിങില്‍ ഒരര്‍ഥത്തിലും രംഗ്പൂരിന് വെല്ലുവിളിയുയര്‍ത്താന്‍ ഡൈനാമൈറ്റ്‌സിന് സാധിച്ചില്ല. ജാഹ്‌രുല്‍ ഇസ്‌ലാം(50) മാത്രമാണ് പൊരുതിനോക്കിയത്. സോഹാഗ് ഗാസി, ഉദാന, നസ്മുല്‍ ഇസ്‌ലാം എന്നിവര്‍ രംഗ്പൂരിനായി രണ്ടുവിക്കറ്റെടുത്തു. അതേസമയം രംഗ്പൂര്‍ നായകനായ മഷ്‌റഫി മൊര്‍ത്താസ ടൂര്‍ണമെന്റിന്റെ നാലു എഡിഷനിലും നാലു വ്യത്യസ്ത ടീമുകള്‍ക്കായിട്ടാണ് കളിച്ചത്. എല്ലാ ടീമുകള്‍ക്കൊപ്പവും കിരീടം നേടിയിട്ടുണ്ടെന്ന റെക്കോര്‍ഡും മൊര്‍ത്താസ വിജയം വഴി സ്വന്തമാക്കി.