വിയന്ന: ഓസ്ട്രിയയിലെ വാതകപ്ലാന്റില്‍ വന്‍ സ്‌ഫോടനം. സംഭവത്തില്‍ ഒരാള്‍ മരിക്കുകയും 18 പേര്‍ക്ക് പരുക്കേല്‍ക്കുകയും ചെയ്തു. ഓസ്ട്രിയയുടെ സ്ലോവാകിയ അതിര്‍ത്തിയില്‍ ചൊവ്വാഴ്ച രാവിലെയാണു സംഭവം.
തലസ്ഥാനമായ വിയന്നയുടെ കിഴക്കു ഭാഗത്തുള്ള ഭൗംഗാര്‍ട്ടന്‍ ആന്‍ഡെര്‍ മാര്‍ച്ചിലെ ഒരു പ്രകൃതി വാതക പ്ലാന്റിലാണ് ഭീകരമായ സ്‌ഫോടനമുണ്ടായത്. നോര്‍വേ, റഷ്യ എന്നിവിടങ്ങളില്‍നിന്നുള്ള പ്രകൃതി വാതകം സൂക്ഷിക്കുന്ന കേന്ദ്രമാണിത്.
സ്‌ഫോടനത്തെ തുടര്‍ന്നു തീപടര്‍ന്ന് കെട്ടിടം പൂര്‍ണമായി അഗ്നിക്കിരയായതായി അധികൃതര്‍ അറിയിച്ചു. സംഭവത്തെ തുടര്‍ന്ന് രണ്ട് മെഡിക്കല്‍ ഹെലികോപ്ടറുകള്‍ എത്തിയാണു രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കിയത്.