ഇസ്‌ലാമാബാദ്: ആകാശത്ത് 'കുഞ്ഞത്ഭുത'ത്തിനു വേദിയായി പാക്-സഊദി വിമാനയാത്ര. വിമാനത്തില്‍ പെണ്‍കുഞ്ഞിനു ജന്മം നല്‍കി പാക് യുവതി ചരിത്രത്തില്‍ ഇടംപിടിച്ചു. മദീനയില്‍നിന്ന് മുള്‍ത്താനിലേക്കു പുറപ്പെട്ട പാകിസ്താന്‍ ഇന്റര്‍നാഷനല്‍ എയര്‍ലൈന്‍സ്(പി.ഐ.എ) ആണ് ഈ അപൂര്‍വ സംഭവത്തിനു സാക്ഷിയായത്. യുവതിക്കു പ്രസവവേദന അനുഭവപ്പെട്ടപ്പോള്‍ വിമാനത്തിലെ ജീവനക്കാര്‍ തന്നെയാണു സഹായത്തിനെത്തി. ഒടുവില്‍ കൈക്കുഞ്ഞുമായി അവര്‍ ഫോട്ടോക്കും പോസ് ചെയ്താണ് യാത്ര അവസാനിച്ചത്.
പി.ഐ.എ തന്നെ ഔദ്യോഗിക ട്വിറ്റര്‍ അക്കൗണ്ടിലൂടെയാണു പ്രസവവിവരം പുറത്തുവിട്ടത്. '' ദിവസവും പല അത്ഭുതങ്ങളും ലോകത്ത് സംഭവിക്കുന്നു. ഇന്ന് ഞങ്ങളുടെ പി.കെ 716 വിമാനത്തിന്റെ മദീനയില്‍നിന്ന് മുള്‍ത്താനിലേക്കുള്ള യാത്രയിലും ഒരു കുഞ്ഞത്ഭുതം സംഭവിച്ചു. ഒരു സുന്ദരിയായ കുഞ്ഞ് ജന്മം കൊണ്ടിരിക്കുന്നു. പുതിയ അതിഥിയുടെ കാര്യത്തില്‍ രക്ഷിതാക്കളെ അഭിനന്ദിക്കുന്നു. പ്രസവത്തിനു വേണ്ട അടിയന്തര സഹായവുമായി ഇടപെട്ട വിമാന ജീവനക്കാര്‍ വലിയ സ്തുതി അര്‍ഹിക്കുന്നു.''-ട്വിറ്ററില്‍ പറയുന്നു. യുവതിയെ കുറിച്ചുള്ള വിവരങ്ങളൊന്നും അധികൃതര്‍ പുറത്തുവിട്ടിട്ടില്ല.