കൊല്ലം: സംസ്ഥാന പവര്‍ ലിഫ്റ്റിങ് ചാംപ്യന്‍ഷിപ്പിന് നാളെ തുടക്കമാകും. ആശ്രാമം എ.വൈ.കെ ഓഡിറ്റോറിയത്തില്‍ നടക്കുന്ന ചാംപ്യന്‍ഷിപ്പ് 17ന് സമാപിക്കും. 14 ജില്ലകളില്‍നിന്നായി നാനൂറോളം ദേശീയ അന്തര്‍ദേശീയ താരങ്ങള്‍ പങ്കെടുക്കും. മുന്‍ ലോക ചാംപ്യനും അര്‍ജുന അവാര്‍ഡ് ജേതാവും ഇന്ത്യന്‍ പവര്‍ ലിഫ്റ്റിങ് ഫെഷറേഷന്‍ സെക്രട്ടറിയുമായ പി.ജെ ജോസഫിന്റെ നേതൃത്വത്തിലുള്ള സംഘമാണ് മത്സരങ്ങളുടെ നടത്തിപ്പിനായി കൊല്ലത്ത് എത്തുന്നത്. നാളെ വൈകിട്ട് അഞ്ചിന് എം മുകേഷ് എം.എല്‍.എ ഉദ്ഘാടനം ചെയ്യും.
17ന് നടക്കുന്ന സമാപന സമ്മേളനം മന്ത്രി ജെ മേഴ്‌സിക്കുട്ടിയമ്മ ഉദ്ഘാടനം ചെയ്യും. എം.എല്‍.എമാരായ എം നൗഷാദ്, എന്‍ വിജയന്‍ പിള്ള സമ്മാനങ്ങള്‍ വിതരണം ചെയ്യും. വാര്‍ത്താ സമ്മേളനത്തില്‍ പവര്‍ ലിഫ്റ്റിങ് അസോസിയേഷന്‍ പ്രസിഡന്റ് എസ്. ചന്ദ്രമണി, സെക്രട്ടറി കെ. ബാബുരാജന്‍, ഓര്‍ഗനൈസിങ് കമ്മിറ്റി ചെയര്‍മാന്‍ കെ സോമയാജി പങ്കെടുത്തു.