കോട്ടയം: കേരളാ കോണ്‍ഗ്രസ് (എം) മഹാസമ്മേളനത്തിന് തുടക്കം. രാഷ്ട്രീയകേരളം ഉറ്റുനോക്കുന്ന മുന്നണി പ്രവേശനം സംബന്ധിച്ച തീരുമാനമുണ്ടാകില്ലെങ്കിലും പാര്‍ട്ടിയുടെ കരുത്ത് വിളിച്ചോതുന്ന ശക്തിപ്രകടനത്തിനാകും ഇന്ന് കോട്ടയം നഗരം സാക്ഷിയാകുക. നെഹ്‌റു സ്റ്റേഡിയത്തില്‍ നടക്കുന്ന മഹാസമ്മേളനത്തില്‍ ഒരു ലക്ഷം പേര്‍ പങ്കെടുക്കുമെന്നാണ് പാര്‍ട്ടി നേതൃത്വം പറയുന്നത്. സമ്മേളനത്തിനു മുന്നോടിയായി ഇന്നലെ ജില്ലയിലെ വിവിധ കേന്ദ്രങ്ങളില്‍ ഇരുചക്ര വാഹന വിളംബര ജാഥകള്‍ നടത്തി. വിളംബര ജാഥകള്‍ സമ്മേളന നഗരിയില്‍ എത്തിയശേഷം പാര്‍ട്ടി ചെയര്‍മാന്‍ കെ.എം മാണി പതാക ഉയര്‍ത്തിയതോടെ സമ്മേളനത്തിനു തുടക്കമായി. വര്‍ക്കിങ് ചെയര്‍മാന്‍ പി.ജെ ജോസഫ്, സി.എഫ് തോമസ്, ജോസ് കെ. മാണി എം.പി, ജോയി എബ്രഹാം എം.പി, എം.എല്‍.എമാരായ മോന്‍സ് ജോസഫ്, റോഷി അഗസ്റ്റിന്‍, എന്‍. ജയരാജ് തുടങ്ങിയവര്‍ പങ്കെടുത്തു.