തൃശൂര്‍: തൃശൂര്‍ കോര്‍പറേഷന്‍ ഡെപ്യൂട്ടി മേയറായി സി.പി ഐയിലെ ബീന മുരളിയെ തെരഞ്ഞെടുത്തു. ഇടതു മുന്നണിയിലെ ധാരണ പ്രകാരം രണ്ട് വര്‍ഷ കാലാവധി പൂര്‍ത്തിയാക്കി സി.പി.എമ്മിന്റെ ഡെപ്യൂട്ടി മേയര്‍ വര്‍ഗീസ് കണ്ടംകുളത്തി രാജിവച്ചതോടെയാണ് തെരഞ്ഞെടുപ്പ് നടന്നത്. ഇതോടെ ചരിത്രത്തിലാദ്യമായി മേയറും ഡെപ്യൂട്ടി മേയറും വനിതകളാകുന്നുവെന്ന അപൂര്‍വ ബഹുമതി തൃശൂര്‍ കോര്‍പറേഷന് സ്വന്തമായി.
എതിര്‍ സ്ഥാനാര്‍ഥിയായി മത്സരിച്ച കോണ്‍ഗ്രസിലെ ജോണ്‍ ഡാനിയേലിനെയാണ് 23നെതിരേ 26 വോട്ടുകള്‍ക്ക് കൃഷ്ണാപുരം ഡിവിഷനിലെ കൗണ്‍സിലറായ ബീന മുരളി പരാജയപ്പെടുത്തിയത്. ആറ് വോട്ടുകളുള്ള ബി.ജെ.പി വോട്ടെടുപ്പില്‍നിന്ന് വിട്ടുനിന്നു.
അജിത ജയരാജനാണ് നിലവിലെ മേയര്‍. മൂന്നംഗങ്ങളുള്ള സി.പി.ഐക്ക് പുരുഷ കൗണ്‍സിലര്‍മാരില്ലാത്തതിനാലാണ് വനിതയെ തന്നെ ഡെപ്യൂട്ടി മേയറാക്കേണ്ടി വന്നത്.