കൊയിലാണ്ടി: ഓഖി ദുരന്തത്തില്‍പ്പെട്ടു കാണാതായ രണ്ടു മത്സ്യത്തൊഴിലാളികളുടെ മൃതദേഹം കൂടി കണ്ടെത്തി.
കൊയിലാണ്ടി ഭാഗത്താണ് മൃതദേഹം കണ്ടെത്തിയത്. തീരത്തുനിന്ന് 20 നോട്ടിക്കല്‍ മൈല്‍ അകലെ പുറം കടലില്‍നിന്ന് കോസ്റ്റ് ഗാര്‍ഡിനാണ് ഒരു മൃതദേഹം ലഭിച്ചത്. കോസ്റ്റ്ഗാര്‍ഡിന്റെ സി-144 കപ്പലില്‍ ഇന്നലെ വൈകിട്ട് മൂന്നരയോടെ മൃതദേഹം ബേപ്പൂര്‍ തുറമുഖത്തെത്തിച്ചു. കൊയിലാണ്ടിയില്‍നിന്ന് മത്സ്യബന്ധനത്തിന് പോയ അഭിഷേക് വഞ്ചിയിലെ മത്സ്യത്തൊഴിലാളികളാണ് പുറംകടലില്‍ ഒഴുകുന്ന മറ്റൊരു മൃതദേഹം കണ്ടത്. ഉടന്‍ കരയിലെ മത്സ്യത്തൊഴിലാളികളേയും പൊലിസിനെയും വിവരമറിയിക്കുകയായിരുന്നു. തുടര്‍ന്ന് കൊയിലാണ്ടിയില്‍നിന്നു പോയ മത്സ്യത്തൊഴിലാളികള്‍ മൃതദേഹം കണ്ടെത്തി കരയ്‌ക്കെത്തിക്കുകയായിരുന്നു. മൃതദേഹങ്ങള്‍ കോഴിക്കോട് മെഡിക്കല്‍ കോളജ് മോര്‍ച്ചറിയിലേക്ക് മാറ്റി. ഇതില്‍ ഒന്നിന്റെ പോസ്റ്റ്‌മോര്‍ട്ടം പൂര്‍ത്തിയാക്കി. തിരച്ചില്‍ ഇന്നും തുടരുമെന്നു കോസ്റ്റ് ഗാര്‍ഡും മറൈന്‍ എന്‍ഫോഴ്‌സ്‌മെന്റും അറിയിച്ചു.