ന്യൂഡല്‍ഹി: മൂന്നു വിവാഹമോചനവും ഒന്നിച്ചുചൊല്ലുന്ന സംവിധാനം (മുത്വലാഖ്) സുപ്രിംകോടതി അസാധുവാക്കിയതോടെ അപ്രകാരംചെയ്യുന്നത് ക്രിമിനല്‍ കുറ്റമാക്കുന്ന ബില്ലിന് കേന്ദ്രമന്ത്രിസഭ അംഗീകാരം നല്‍കി. നിയമം ലഘിച്ച് മുത്വലാഖ് മുഖേന ഭാര്യയെ മൊഴിചൊല്ലുന്നത് ജാമ്യമില്ലാ കുറ്റമാക്കുന്ന കരട് ബില്ലിന് വെള്ളിയാഴ്ച ചേര്‍ന്ന കേന്ദ്രമന്ത്രിസഭായോഗമാണ് അംഗീകാരം നല്‍കിയത്.

ബില്ല് നടപ്പുപാര്‍ലമെന്റ് സമ്മേളനത്തില്‍ അവതരിപ്പിക്കും. കുറ്റക്കാര്‍ക്ക് മൂന്നുവര്‍ഷം തടവും പിഴശിക്ഷയും കരട് നിയമം അനുശാസിക്കുന്നുണ്ട്. ഷാബാനു നിയമം എന്നറിയപ്പെടുന്ന 1986ലെ മുസ്‌ലിം സ്ത്രീ (വിവാഹമോചനത്തില്‍ നിന്നുള്ള അവകാശ സംരക്ഷണം) നിയമം ഭേദഗതിചെയ്താണ് കരട് തയ്യാറാക്കിയിരിക്കുന്നത്. ഇതുപ്രകാരം മുത്വലാഖ് മുഖേന മൊഴിചൊല്ലപ്പെടുന്ന സ്ത്രീകള്‍ക്ക് കോടതിയെ സമീപ്പിക്കാവുന്നതാണ്. ഭര്‍ത്താവില്‍ നിന്നു തനിക്ക് ഉപജീവനമാര്‍ഗം ആവശ്യപ്പെടാനും സ്ത്രീക്ക് അവകാശമുണ്ട്.

ജോലി ലഭ്യമായിട്ടില്ലാത്തവരോ പ്രായപൂര്‍ത്തിയെത്താത്തവരോ ആയ മക്കളുണ്ടെങ്കില്‍ അവരുടെ ചെലവിലേക്കുള്ള തുകയും ഭര്‍ത്താവില്‍ നിന്ന് ആവശ്യപ്പെടാനും സ്ത്രീക്കു കരട് നിയമം അനുവാദം നല്‍കുന്നു. നിലപാട് അറിയിക്കാനായി കരട് രൂപം സംസ്ഥാനങ്ങള്‍ക്ക് അയച്ചുകൊടുത്തിട്ടുണ്ട്.

മുതിര്‍ന്ന കേന്ദ്രമന്ത്രിമാരായ രാജ്‌നാഥ് സിങ്, സുഷമാസ്വരാജ്, അരുണ്‍ ജെയ്റ്റ്‌ലി, രവിശങ്കര്‍ പ്രസാദ് എന്നിവരടങ്ങുന്ന മന്ത്രിസഭാ ഉപസമിതിയാണ് കരടിന് രൂപം നല്‍കിയത്. പെട്ടെന്ന് ഭാര്യയെ മൂന്നുമൊഴിയും ഒന്നിച്ചുചൊല്ലുന്നു എന്നു നേരിട്ടോ, എഴുത്തിലൂടെയോ, ഇലക്ട്രോണിക് സംവിധാനം ഉള്‍പ്പെടെയുള്ള മാധ്യമം മുഖേനയോ അറിയിക്കുന്നതെല്ലാം സുപ്രിംകോടതി അസാധുവാക്കിയിട്ടുണ്ടെന്നും കരട് വിശദീകരിക്കുന്നു.

അതേസമയം, ബില്ല് ഇതിനകം ബി.ജെ.പി ഭരിക്കുന്ന എട്ട് സംസ്ഥാനങ്ങള്‍ അംഗീകരിച്ചു. അസം, ജാര്‍ഖണ്ഡ്, മധ്യപ്രദേശ്, മഹാരാഷ്ട്ര, മണിപ്പൂര്‍, ഉത്തര്‍പ്രദേശ്, ഉത്തരാഖണ്ഡ് എന്നീ സംസ്ഥാന സര്‍ക്കാരുകളാണ് അംഗീകാരം നല്‍കിയത്.