ന്യൂഡല്‍ഹി: കായല്‍ കൈയേറ്റ കേസില്‍ മുന്‍മന്ത്രി തോമസ് ചാണ്ടി സമര്‍പ്പിച്ച ഹരജി പരിഗണിക്കുന്നത് സുപ്രിംകോടതി ജനുവരിയിലേക്ക് നീട്ടി. ഹരജി പരിഗണിക്കുന്ന മൂന്നംഗ ബെഞ്ചില്‍നിന്ന് ജസ്റ്റിസ് എ.എം ഖാന്‍വില്‍ക്കര്‍ അപ്രതീക്ഷിതമായി പിന്‍മാറിയതോടെയാണ് കേസ് നീട്ടിവച്ചത്.
ചീഫ് ജസ്റ്റിസ് ദീപക് മിശ്ര, ഡി.വൈ ചന്ദ്രചൂഡ്, എ.എം ഖാന്‍വില്‍ക്കര്‍ എന്നിവരടങ്ങിയ ബെഞ്ചായിരുന്നു ഇന്നലെ കേസ് പരിഗണിക്കേണ്ടിയിരുന്നത്. കാരണം വ്യക്തമാക്കാതെയാണ് ഖാന്‍വില്‍ക്കറിന്റെ പിന്‍മാറ്റം. പുതിയ ബെഞ്ച് മുന്‍പാകെയാകും ജനുവരിയില്‍ കേസ് എത്തുക.
ജസ്റ്റിസുമാരായ ആര്‍.കെ അഗര്‍വാള്‍, എ.എം സപ്രെ എന്നിവരടങ്ങുന്ന രണ്ടംഗബെഞ്ച് മുന്‍പാകെയായിരുന്നു ആദ്യം കേസ് എത്തിയത്. എന്നാല്‍, സപ്രെ ഉള്ള ബെഞ്ചില്‍ കേസ് പരിഗണിക്കുന്നത് ഒഴിവാക്കണമെന്ന് ആവശ്യപ്പെട്ട് തോമസ് ചാണ്ടി ചീഫ് ജസ്റ്റിസിന് കത്തുനല്‍കി. ഇതേത്തുടര്‍ന്നാണ് ഹരജി പരിഗണിക്കാനായി ചീഫ് ജസ്റ്റിസിന്റെ അധ്യക്ഷതയിലുള്ള മൂന്നംഗ ബെഞ്ച് രൂപീകരിച്ചത്. ഈ ബെഞ്ചില്‍ നിന്നാണ് ഇന്നലെ ഖാന്‍വില്‍ക്കര്‍ പിന്‍വാങ്ങിയത്. കായല്‍ കൈയേറിയെന്ന കേസില്‍ ഹൈക്കോടതി ഉത്തരവും ജില്ലാ കലക്ടറുടെ റിപ്പോര്‍ട്ടിന്‍മേലുള്ള നടപടികളും റദ്ദാക്കണമെന്ന് ആവശ്യപ്പെട്ട് തോമസ് ചാണ്ടി സമര്‍പ്പിച്ച ഹരജിയാണ് സുപ്രിംകോടതിയിലുള്ളത്.
അതേസമയം, ബെഞ്ച് മാറ്റണമെന്ന തോമസ് ചാണ്ടിയുടെ ആവശ്യം കോടതിയലക്ഷ്യമാണെന്ന് കേസില്‍ കക്ഷിചേരണമെന്ന് ആവശ്യപ്പെട്ട് അപേക്ഷ നല്‍കിയ സി.പി.ഐ പ്രവര്‍ത്തകന്‍ ടി.എന്‍ മുകുന്ദന്‍ ബോധിപ്പിച്ചു. തോമസ് ചാണ്ടിയുടെ ഹരജിയില്‍ തടസ്സ ഹരജി നല്‍കിയ മുകുന്ദന്‍, തന്റെ വാദം കേള്‍ക്കാതെ കേസില്‍ വിധിപറയരുതെന്ന് ആവശ്യപ്പെട്ടിട്ടുണ്ട്. മുകുന്ദന്റെ ഹരജിയിലും ജനുവരിയില്‍ തീരുമാനമെടുക്കും.