മുംബൈ: മഹാരാഷ്ട്രയില്‍ കുഷ്ഠരോഗികളുടെ എണ്ണം വര്‍ധിക്കുന്നതായി റിപ്പോര്‍ട്ട്. ഈ വര്‍ഷം 5,004 പേരെയാണ് കുഷ്ഠരോഗവുമായി ബന്ധപ്പെട്ട് ആശുപത്രിയില്‍ പ്രവേശിപ്പിച്ചത്. ഇതില്‍ 41 ശതമാനം മാരക കുഷ്ഠരോഗത്തിന്റെ വിഭാഗത്തില്‍ പെടുന്നവയാണ്. ഇവ എളുപ്പത്തില്‍ പടര്‍ന്നു പിടിക്കുന്നവയാണെന്ന് ഡോക്ടര്‍മാര്‍ മുന്നറിയിപ്പ് നല്‍കിയിട്ടുണ്ട്. കേന്ദ്രസര്‍ക്കാരിന്റെയും ആരോഗ്യ മന്ത്രാലയത്തിന്റെയും റിപ്പോര്‍ട്ടുകള്‍ കുഷ്ഠരോഗത്തെ വര്‍ഷങ്ങള്‍ക്ക് മുന്‍പ് നിയന്ത്രണവിധേയമാക്കിയെന്ന് അവകാശപ്പെട്ടിരുന്നു.
എന്നാല്‍ അടുത്തിടെ കുഷ്ഠരോഗികളുടെ എണ്ണം വര്‍ധിച്ചത് ആശങ്കപ്പെടുത്തുന്നതാണെന്ന് സംസ്ഥാനത്തെ ഡോക്ടര്‍മാര്‍ പറയുന്നു. സെപ്റ്റംബറില്‍ മഹാരാഷ്ട്ര സര്‍ക്കാരിന്റെ നേതൃത്വത്തില്‍ നടത്തിയ സര്‍വേയിലാണ് രോഗികളുടെ എണ്ണത്തില്‍ വര്‍ധനയുണ്ടെന്ന് കണ്ടെത്തിയത്. രോഗികളില്‍ 11 ശതമാനം കുട്ടികളാണ്. പ്രതിരോധശേഷി കുട്ടികളില്‍ കുറവായതിനാലാണ് രോഗം പെട്ടെന്ന് വരാന്‍ ഇടയാക്കുന്നതെന്ന് ബോംബെ ലെപ്രസി പ്രൊജക്ടിന്റെ സ്ഥാപകനായ ഡോ. വിവേക് പൈ പറഞ്ഞു.ദേശീയ ശരാശരിയേക്കാള്‍ മുകളിലാണ് സംസ്ഥാന ശരാശരിയെന്നും അദ്ദേഹം കൂട്ടിച്ചേര്‍ത്തു.
ബാക്ടീരിയകളുടെ സാന്നിധ്യം കൂടുതലുള്ള രോഗികളാണ് സര്‍വേയില്‍ കണ്ടെത്തിയതിലധികവും. ഇത് വേഗത്തില്‍ പടര്‍ന്നുപിടിക്കുമെന്ന് ഡോക്ടര്‍മാര്‍ മുന്നറിയിപ്പ് നല്‍കിയിട്ടുണ്ട്. അതേസമയം രോഗികളിലധികവും നിരീക്ഷണത്തിലാണ്. സംസ്ഥാനത്തെ ക്ലിനിക്കുകളില്‍ വിദഗ്ധ ചികിത്സ ലഭ്യമാക്കിയിട്ടുണ്ടെന്ന് ആരോഗ്യ മന്ത്രാലയം അറിയിച്ചു.