കോട്ടയം : 2019ലെ ലോക്‌സഭാ തെരഞ്ഞെടുപ്പ് മുന്നില്‍ക്കണ്ട് എല്‍.ഡി.എഫിനോടുള്ള ആഭിമുഖ്യം മഹാസമ്മേളനത്തില്‍ പ്രഖ്യാപിക്കാനുള്ള കെ.എം.മാണിയുടെ നീക്കം മരവിപ്പിച്ചത് ജോസഫ് വിഭാഗം പയറ്റിയ തന്ത്രത്തിന്റെ വിജയമായി.
പാര്‍ട്ടി വൈസ് ചെയര്‍മാന്‍ ജോസ്.കെ.മാണിയുടെയും അദ്ദേഹത്തെ അനുകൂലിക്കുന്ന പാര്‍ട്ടിയിലെ രണ്ടാം തലമുറ നേതൃത്വത്തിന്റെയും താല്‍പര്യമാണ് താല്‍ക്കാലികമായെങ്കിലും വെട്ടിനിരത്തപ്പെട്ടത്. മാണി വിഭാഗത്തിലെ സി.എഫ് തോമസ് ഉള്‍പ്പെടെയുള്ള മുതിര്‍ന്ന നേതാക്കളുടെ ആശിര്‍വാദവും ജോസഫ് വിഭാഗത്തിന്റെ നീക്കത്തിനുണ്ട്. ഇതിനായി തോമസ് ഉണ്ണിയാടന്റെ നേതൃത്വത്തില്‍ സി.എഫ് തോമസിന്റെ വീട്ടിലുള്‍പ്പെടെ രസഹ്യയോഗങ്ങള്‍ ചേര്‍ന്നിരുന്നു. പാര്‍ട്ടിയുടെ ജില്ലാ പ്രസിഡന്റുമാരുടെ പിന്തുണയും ഇവര്‍ ഉറപ്പാക്കിയിട്ടുണ്ട്.
കെ.എം.മാണിയില്‍ നിന്ന് ജോസ്.കെ.മാണി ചെയര്‍മാന്‍ സ്ഥാനം ഏറ്റെടുക്കാനിരുന്നതും ഇടതുമുന്നണിയുമായി അടുപ്പം സ്ഥാപിക്കുന്നതിന്റെ അരങ്ങൊരുക്കലിന്റെ ഭാഗമായിരുന്നു. അതുകൊണ്ടുതന്നെ മുന്നണി പ്രവേശനം മഹാസമ്മേളനത്തില്‍ പ്രഖ്യാപിക്കാനില്ലെന്നും നേതൃമാറ്റം അജണ്ടയിലില്ലെന്നും മാണിയെ കൊണ്ട് തീരുമാനമെടുപ്പിക്കാന്‍ ജോസഫ് വിഭാഗത്തിന് കഴിഞ്ഞു. ഇക്കാര്യത്തില്‍ ജോസ്.കെ.മാണി അടക്കമുള്ള പുതുതലമുറ നേതൃത്വത്തിന് കടുത്ത അമര്‍ഷമുണ്ട്. ഇതോടെ കേരളാ കോണ്‍ഗ്രസ് (എം)ല്‍ വീണ്ടുമൊരു പിളര്‍പ്പിന് കളമൊരുങ്ങുകയാണ്. മഹാസമ്മേളനത്തിന് മുമ്പ് ജോസഫ് വിഭാഗം മാത്രം പുറത്തു പോകുമെന്ന സ്ഥിതിയായിരുന്നെങ്കില്‍ ഇപ്പോഴത് മാണി വിഭാഗത്തിലെ തന്നെ സി.എഫ് തോമസ് അടക്കമുള്ള പ്രമുഖരും അവരോടൊപ്പമുണ്ടാകുമെന്ന സാഹചര്യമാണുണ്ടായിരിക്കുന്നത്.
ഇടതുമുന്നണി പ്രവേശനം സംബന്ധിച്ച തീരുമാനമെടുക്കുമ്പോള്‍ പാര്‍ട്ടിക്കുള്ളില്‍ വിമതശബ്ദങ്ങളൊഴിവാക്കാന്‍ ലക്ഷ്യമിട്ടാണ് ജില്ലാ-സംസ്ഥാന ഭാരവാഹിത്വങ്ങളിലേക്ക് ജോസ്.കെ.മാണി നിര്‍ദേശിക്കുന്നവരെ കൊണ്ടുവന്നത്. കോട്ടയം ജില്ലാ പ്രസിഡന്റ് ഇ.ജെ.ആഗസ്തിയെ മാറ്റി സണ്ണി തെക്കേടത്തിന് സ്ഥാനം നല്‍കിയത് ഇതിന്റെ ഭാഗമായാണ്. കോട്ടയം ജില്ലാ പഞ്ചായത്തില്‍ എല്‍.ഡി.എഫുമായി സഹകരിക്കാനുള്ള തീരുമാനത്തിനെതിരേ ആഗസ്തി പരസ്യമായി തന്നെ രംഗത്ത് വന്നിരുന്നു.
പൊതുവില്‍ യു.ഡി.എഫിന് അനുകൂലമായ നിലപാട് സ്വീകരിക്കുന്ന പഴയ തലമുറയിലെ നേതാക്കളെയാകെ നിശബ്ദരാക്കി മഹാസമ്മേളനത്തിലേക്ക് കടക്കുകയായിരുന്നു മാണിയുടെ ലക്ഷ്യം. ഈ നീക്കമാണ് ജോസഫ് വിഭാഗം തന്ത്രപരമായ നീക്കങ്ങളിലൂടെ പൊളിച്ചടുക്കിയത്. ഇന്നലെ നടന്ന പ്രതിനിധി സമ്മേളനത്തിലും മുന്നണി പ്രവേശനം സംബന്ധിച്ച തീരുമാനം ചര്‍ച്ചയായില്ല. തോമസ് ഉണ്ണിയാടന്‍ വ്യക്തമായി തന്നെ യു.ഡി.എഫിനെ അനുകൂലിച്ച് സംസാരിച്ചപ്പോള്‍ സി.എഫ്.തോമസ് അദ്ദേഹത്തെ പിന്തുണച്ച് സംസാരിച്ചു. ഏതായാലും മുന്നണി പ്രവേശനം സംബന്ധിച്ച തീരുമാനത്തോടടുക്കുമ്പോള്‍ കേരളാ കോണ്‍ഗ്രസ് (എം) പുതിയ ഒരു പ്രതിസന്ധിയെയാണ് നേരിടുന്നത്.
എല്‍.ഡി.എഫ് പ്രവേശനം തീരുമാനിച്ചാല്‍ ജോസഫ് വിഭാഗവും യു.ഡി.എഫിലേക്കല്ലാതെ ഒറ്റയ്ക്ക് നിന്നാലും സി.എഫ്.തോമസും പ്രബല വിഭാഗവും കെ.എം.മാണിയെ കൈവെടിയുമെന്ന സാഹചര്യമാണുള്ളത്. ഏതായാലും വേണ്ടത്ര മുന്നൊരുക്കങ്ങളില്ലാതെ എല്‍.ഡി.എഫില്‍ ചേക്കേറാന്‍ നടത്തിയ നീക്കം കെ.എം.മാണിയെ തന്റെ രാഷ്ട്രീയ ജീവിതത്തിലെ ഏറ്റവും വലിയ പ്രതിസന്ധിയിലേക്കാണ് കൊണ്ടെത്തിക്കുന്നത്.