നാദാപുരം: പ്ലാസ്റ്റിക് മാലിന്യം അടിഞ്ഞുകൂടിയപ്പോള്‍ നിലച്ചത് ഒരു പുഴയുടെ ജീവന്‍. മയ്യഴിപ്പുഴയുടെ ഭാഗമായ വിഷ്ണുമംഗലം പുഴയുടെ ഒഴുക്കാണ് നിലച്ചത്. 

വടകരയിലേക്കുള്ള ജലവിതരണത്തിനായി കോണ്‍ക്രീറ്റ് ബണ്ട് നിര്‍മിച്ച് വെള്ളം തടഞ്ഞുനിര്‍ത്തിയിരുന്നു. ഇത്മൂലം ബണ്ടിന് താഴ്ഭാഗത്തായി സ്ഥാപിച്ച നാല് പൈപ്പുകളില്‍നിന്നുള്ള വെള്ളം മാത്രമാണ് പുഴയുടെ താഴ്ഭാഗത്തുള്ളവര്‍ക്ക് ലഭിക്കുന്നത്.

മഴക്കാലത്ത് ഒഴുകിയെത്തിയ പ്ലാസ്റ്റിക് അടക്കമുള്ള മാലിന്യങ്ങള്‍ മരങ്ങളിലും മറ്റും തടഞ്ഞു കെട്ടിക്കിടക്കുന്നതിനാല്‍ ഇപ്പോള്‍ പുഴയുടെ ഒഴുക്ക് പൂര്‍ണമായും തടസപ്പെട്ട നിലയിലാണ്.

വെള്ളം ഒഴുകിയിരുന്ന ഇരുഭാഗങ്ങളും കാടു പിടിച്ച് മൂടിക്കിടക്കുന്നതിനാല്‍ ചെളിയും മണ്ണും നിറഞ്ഞ് പുഴയുടെ വ്യാപ്തിയും ശോഷിച്ചിരിക്കുകയാണ്.  അതേസമയം പുഴ സംരക്ഷിക്കണമെന്നാവശ്യപ്പെട്ട് അധികൃതരെ സമീപിച്ചെങ്കിലും യാതൊരു നടപടികളുമുണ്ടായില്ലെന്ന് നാട്ടുകാര്‍ ആരോപിച്ചു.