ഗാന്ധിനഗര്‍: ഗുജറാത്തില്‍ നാലാം സ്ഥാനം കരസ്ഥമാക്കിയത് നോട്ട. സ്ഥാനാര്‍ഥികളില്‍ വിശ്വാസമില്ലെങ്കില്‍ ആര്‍ക്കും വോട്ടുചെയ്യേണ്ടെന്ന് തീരുമാനിക്കാവുന്ന സാഹചര്യമുണ്ടായപ്പോഴാണ് നോട്ട മിന്നുംതാരമായത്. ആറാം തവണയും അധികാരത്തിലേക്ക് ജയിച്ചുകയറിയ ബി.ജെ.പിക്കും തൊട്ടുപിന്നാലെ കോണ്‍ഗ്രസും തുടര്‍ന്ന് സ്വതന്ത്ര സ്ഥാനാര്‍ഥികളും കഴിഞ്ഞാല്‍ നോട്ടയാണ് വോട്ടുവിഹിതം കണക്കാക്കിയാല്‍ നാലാം സ്ഥാനത്ത് നിലയുറപ്പിച്ചത്. പല മണ്ഡലങ്ങളിലും നോട്ട നിര്‍ണായക ഘടകമാകുകയും ചെയ്തു.
49.1 ശതമാനം വോട്ടാണ് ബി.ജെ.പിക്ക് ലഭിച്ചത്. എന്നാല്‍ സ്വതന്ത്രര്‍ 4.3 ശതമാനം വോട്ടുകള്‍ കരസ്ഥമാക്കി. ബി.എസ്.പി-0.7 ശതമാനം, എന്‍.സി.പി-0.6 ശതമാനം വോട്ടുകള്‍ നേടിയപ്പോള്‍ നോട്ടക്ക് ലഭിച്ചത് 1.8 ശതമാനം വോട്ടുകളാണ്. പ്രാഥമിക കണക്കുകള്‍പ്രകാരം 5,51,294 വോട്ടുകളാണ് നോട്ടക്ക് നേടാനായത്. പോര്‍ബന്തറില്‍ ബി.ജെ.പി വിജയിച്ചത് കേവലം 1855 വോട്ടുകള്‍ക്കാണ്. ഇവിടെ നോട്ടക്ക് ലഭിച്ചത് 3,433 വോട്ടുകളാണ്.