സാന്റിയാഗോ: ചിലിയില്‍ സെബാസ്റ്റ്യന്‍ പിനേര പ്രസിഡന്റ് പദവിയിലേക്ക്. മുന്‍ പ്രസിഡന്റും കോടീശ്വരനുമായ സെബാസ്റ്റ്യന്‍ പിനേര ഇടതുപക്ഷക്കാരനായ അലെജാന്‍ഡ്രോ ഗില്ലിയറിനെ തോല്‍പ്പിച്ചാണ് രണ്ടാം തവണയും അധികാരമുറപ്പിച്ചത്.
നാലുവര്‍ഷത്തെ ഇടവേളയ്ക്കുശേഷം പ്രസിഡന്റ് പദവിയിലേക്ക് തിരിച്ചുവരുന്ന പിനേരയെ ഗില്ലിയര്‍ അഭിനന്ദനമറിയിച്ചു. 54 ശതമാനത്തിലധികം വോട്ട് നേടിയാണ് പിനേര ജയമുറപ്പിച്ചത്. സോഷ്യലിസ്റ്റ് പ്രസിഡന്റായ മൈക്കല്‍ ബാച്ച്‌ലറ്റാണ് നിലവിലെ പ്രസിഡന്റ്.
വിദേശത്തുള്ള ചിലി സ്വദേശികള്‍ക്ക് ആദ്യമായി വോട്ടു ചെയ്യാന്‍ അവസരം ലഭിച്ച തെരഞ്ഞെടുപ്പ് കൂടിയായിരുന്നു ഇത്തവണത്തേത്. ഇവരുള്‍പ്പടെ 14 ദശലക്ഷം വോട്ടര്‍മാര്‍ക്കായിരുന്നു സമ്മതിദാനാവാകാശമുണ്ടായിരുന്നത്. എങ്കിലും 48.5 ശതമാനം വോട്ടുകള്‍ മാത്രമായിരുന്നു പോള്‍ ചെയ്യപ്പെട്ടത്.
ചിലിയിലെ കോടീശ്വരനായ സാമ്പത്തിക വിദഗ്ധന്‍ എന്നാണ് വ്യവസായിയായ സെബാസ്റ്റ്യന്‍ പിനേരയെ വിശേഷിപ്പിക്കുന്നത്. ഏറ്റുമുട്ടലിനേക്കാള്‍ ധാരണകളാണ് ചിലിയിലെ ജനങ്ങള്‍ക്കാവശ്യമെന്നും അതുകൊണ്ടാണ് അവര്‍ തന്നെ തെരഞ്ഞെടുത്തതെന്നും വിജയത്തിനുശേഷം പിനേര പ്രതികരിച്ചു. 2010 മുതല്‍ 2014 വരെയായിരുന്നു ഇതിനു മുന്‍പ് പിനേര ചിലിയുടെ പ്രസിഡന്റ് സ്ഥാനം അലങ്കരിച്ചിരുന്നത്. രണ്ടുദശകം നീണ്ടുനിന്ന ഇടതുഭരണം അവസാനിപ്പിച്ചുകൊണ്ടായിരുന്നു അന്ന് പിനേരയുടെ വിജയം. ഇത്തവണത്തെ തെരഞ്ഞെടുപ്പില്‍ വ്യവസായ സമൂഹത്തില്‍ നിന്നായിരുന്നു പിനേരക്ക് കൂടുതലും പിന്തുണ ലഭിച്ചിരുന്നത്. അധികാരത്തിലെത്തിയാല്‍ നികുതി കുറയ്ക്കുമെന്നതായിരുന്നു പിനേരയുടെ ഏറ്റവും വലിയ തെരഞ്ഞെടുപ്പ് പ്രചാരണം. അതേസമയം മരുമകള്‍ ഉള്‍പ്പെട്ട അഴിമതിക്കേസാണ് ബാച്ചലെറ്റിന്റെ വിജയത്തിന് തടസമായത്.
ദശകങ്ങളായി അര്‍ജന്റീന, ബൊളീവിയ, ബ്രസീല്‍, ചിലി, ക്യൂബ, ഇക്വഡോര്‍, നിക്കരാഗ്വ, ഉറുഗ്വെ, വെനിസ്വല എന്നിവിടങ്ങളില്‍ ഇടതുഭരണമാണ്. എന്നാല്‍ അടുത്ത കാലത്ത് യാഥാസ്ഥിതികര്‍ ശക്തിയാര്‍ജിക്കുന്ന കാഴ്ചയാണ് അര്‍ജന്റീന, ബ്രസീല്‍, പരാഗ്വെ, വെനിസ്വല എന്നിവിടങ്ങളില്‍ കാണാനാകുന്നത്. ഈ പട്ടികയിലേക്കാണ് ചിലിയും പോകുന്നതെന്നാണ് തെരഞ്ഞടുപ്പ് ഫലം വ്യക്തമാക്കുന്നത്.