ദുബൈ: ഐ.സി.സിയുടെ ഏറ്റവും പുതിയ ഏകദിന റാങ്കിങില്‍ താത്കാലിക ഇന്ത്യന്‍ ക്യാപ്റ്റനും ഓപണറുമായി രോഹിത് ശര്‍മയ്ക്ക് നേട്ടം. രണ്ട് സ്ഥാനങ്ങള്‍ ഉയര്‍ന്ന് രോഹിത് അഞ്ചാം സ്ഥാനത്തേക്ക് കയറി. ശ്രീലങ്കക്കെതിരായ രണ്ടാം ഏകദിനത്തില്‍ പുറത്താകാതെ 208 റണ്‍സടിച്ച് കരിയറിലെ മൂന്നാം ഏകദിന ഡബിള്‍ സെഞ്ച്വറി തികച്ചതാണ് രോഹിതിന്റെ മുന്നേറ്റത്തില്‍ പ്രതിഫലിച്ചത്. രോഹിതിന്റെ സഹ ഓപണര്‍ ശിഖര്‍ ധവാനും നേട്ടമുണ്ടാക്കി. ശ്രീലങ്കക്കെതിരായ പരമ്പരയിലെ അവസാന മത്സരത്തില്‍ പുറത്താകാതെ സെഞ്ച്വറി നേടുകയും പരമ്പരയിലെ താരമായി മാറുകയും ചെയ്ത ധവാന്‍ ഒരു സ്ഥാനം ഉയര്‍ന്ന് 14ാം റാങ്കിലെത്തി.
ഇന്ത്യന്‍ ബൗളര്‍മാരില്‍ യുസ്‌വേന്ദ്ര ചഹല്‍ വന്‍ നേട്ടമുണ്ടാക്കി. ശ്രീലങ്കക്കെതിരേ മൂന്ന് മത്സരങ്ങളില്‍ നിന്ന് ആറ് വിക്കറ്റുകള്‍ വീഴ്ത്തിയ ചഹല്‍ ഒറ്റയടിക്ക് 23 സ്ഥാനങ്ങള്‍ മെച്ചപ്പെടുത്തി 28ാം റാങ്കിലേക്ക് കുതിച്ചുകയറി. കുല്‍ദീപ് യാദവ് 16 സ്ഥാനങ്ങള്‍ ഉയര്‍ന്ന് 56ാം റാങ്കിലെത്തി. ഓള്‍റൗണ്ടര്‍ ഹര്‍ദിക് പാണ്ഡ്യ പത്ത് സ്ഥാനങ്ങളുയര്‍ന്ന് 45ാം റാങ്കിലേക്ക് കയറി.