ചൈനീസ് കമ്പനിയായ ഷവോമിയുടെ ആദ്യ ആന്‍ഡ്രോയിഡ് വണ്‍ സ്മാര്‍ട്‌ഫോണ്‍ മീ എ1 ന്റെ പ്രത്യേക എഡിഷന്‍ പുറത്തിറക്കി. സ്‌പെഷ്യല്‍ എഡിഷന്‍ മിഎ1 ഇപ്പോള്‍ 13,999 രൂപയ്ക്ക് ലഭ്യമാകും. പുതിയ ഒരു നിറം കൂടി ചേര്‍ത്തതോടെ ഷവോമി മിഎ1 ഇപ്പോള്‍ ബ്ലാക്ക്, ഗോള്‍ഡ്, റോസ് ഗോള്‍ഡ്, ചുവപ്പ് നിറങ്ങളില്‍ ലഭ്യമാകും.

മി 5എക്‌സിന് ഏതാണ്ട് സമാനമായ സവിശേഷതകളാണ് മി എ1 നുള്ളത്. പുതിയ ഷവോമി മി എ1 ലും ഇരട്ട ക്യാമറ സംവിധാനമുണ്ട്. ആന്‍ഡ്രോയ്ഡ് വണ്‍ പദ്ധതിയുടെ ഭാഗമായിരിക്കുമ്പോള്‍ തന്നെ, മി ക്യാമറ, മി റിമോട്ട്, മി സ്റ്റോര്‍ ആപ്‌സ് തുടങ്ങിയ ആപ്പുകള്‍ ഈ സ്മാര്‍ട്ട്‌ഫോണില്‍ നിലനിര്‍ത്തിയിട്ടുണ്ട്. സെറ്റിംഗ്‌സിലെ മി സര്‍വീസസ് എന്ന ഭാഗവും മി എ1 ല്‍ നിലനിര്‍ത്തിയിട്ടുണ്ട്.

ഷവോമി മി എ 1 ഡുവല്‍ സിം (നാനോ സിം) സ്മാര്‍ട്ട്‌ഫോണ്‍ ആന്‍ഡ്രോയ്ഡ് 7.1.2 നൗഗട്ടിലാണ് പ്രവര്‍ത്തിക്കുന്നത്. 5.5 ഇഞ്ച് ഫുള്‍ എച്ച്ഡി (1080x1920) ഡിസ്‌പ്ലേയ്ക്ക് കോണിംഗ് ഗോറില്ലാ ഗ്ലാസിന്റെ അധിക സംരക്ഷണമുണ്ട്.

ഒക്ടാകോര്‍ ക്വല്‍കോം സ്‌നാപ്ഡ്രാഗണ്‍ 625 SoC പ്രോസസര്‍ കരുത്തു പകരുന്ന ഫോണിന് 4 ജിബിയാണ് റാം നല്‍കിയിരിക്കുന്നത്.

12 മെഗാപിക്‌സലിന്റെ ഇരട്ട ക്യാമറയാണ് പിന്‍ഭഗത്ത് നല്‍കിയിരിക്കുന്നത്. ഇവയില്‍ ഒന്ന് f/2.2 അപേര്‍ച്ചര്‍, 1.25 മൈക്രോ പിക്‌സല്‍ സെന്‍സര്‍ എന്നിവയോട് കൂടിയ വൈഡ് ആംഗിള്‍ ലെന്‍സും, മറ്റേത് f/2.6 അപേര്‍ച്ചര്‍, 1 മൈക്രോ മില്യണ്‍ സെന്‍സര്‍ എന്നിവയോട് കൂടിയ ടെലിഫോട്ടോ ലെന്‍സുമാണ്.

 സെല്‍ഫികള്‍ക്കായി തത്സമയ ബ്യൂട്ടിഫിക്കേഷന്‍ മോഡ് ഉള്‍പ്പെടുത്തിയിട്ടുള്ള ഒരു 5 മെഗാപിക്‌സല്‍ മുന്‍ക്യാമറയും ഈ ഫോണിലുണ്ട്.