ബംഗളൂരു: കരുത്തരായ ബംഗളൂരു എഫ്.സിയെ നാടകീയ പോരാട്ടത്തില്‍ കീഴടക്കി ജംഷഡ്പൂര്‍ എഫ്.സി സീസണിലെ രണ്ടാം വിജയം സ്വന്തമാക്കി. ഇന്ത്യന്‍ സൂപ്പര്‍ ലീഗ് പോരാട്ടത്തില്‍ മറുപടിയില്ലാത്ത ഒറ്റ ഗോളിനാണ് എവേ പോരാട്ടത്തില്‍ ജംഷഡ്പൂര്‍ വിജയം സ്വന്തമാക്കിയത്. അവസാന നിമിഷം വരെ മത്സരം ഗോള്‍രഹിതമായി വിരസമായി കടന്നുപോയപ്പോള്‍ 90 മിനുട്ടും പൂര്‍ത്തിയായി ലഭിച്ച ഇഞ്ച്വറി ടൈമില്‍ അപ്രതീക്ഷിതമായി കിട്ടിയ പെനാല്‍റ്റി വലയിലാക്കിയാണ് ജംഷഡ്പൂരിന്റെ വിജയം. മത്യാസ് ട്രിന്‍ഡെഡാണ് വല ചലിപ്പിച്ചത്.